Իրանը եւ Հայաստանը կարող են սերտ համագործակցություն հաստատել տարածաշրջանում առկա հակամարտություններն ու ճգնաժամերը լուծելու համար: Այս մասին Թեհրանում՝ Հայաստանի վարչապետ Կարեն Կարապետյանի հետ հանդիպման ժամանակ, հայտարարել է Իրանի նախագահ Հասան Ռուհանին, հաղորդում է Tasnim-ը:
Անդրադառնալով Սիրիայում, Եմենում եւ Իրաքում տիրող իրավիճակին՝ Իրանի նախագահը նշել է, որ այս հակամարտությունների կարգավորումը ողջ տարածաշրջանի շահերից է բխում:
«Պատերազմներն ու տարածաշրջանային տարաձայնությունների ավելացումը չեն բխում որեւէ երկրի շահերից, եւ տարածաշրջանի բոլոր կառավարությունները պետք է կայուն խաղաղության եւ հանգստության հաստատմանը ձգտեն», - ավելացրել է Ռուհանին:
Նա ընդգծել է Թեհրանի եւ Երեւանի միջեւ քաղաքական եւ տնտեսական հարաբերությունների ընդլայնման անհրաժեշտությունը: Ռուհանին նշել է, որ իր վարչակազմը կխրախուսի մասնավոր հատվածին ներդրումներ կատարել Հայաստանի տարբեր ոլորտներում, ինչպիսիք են ճանապարհների, բնակարանների, ամբարտակների եւ էլեկտրակայանների շինարարությունը։