Խորհրդարանական ընտրություններից առաջ «Ելք» դաշինքի վստահված անձանց վրա հարձակում գործելու գործով դատական առաջին նիստն այսօր՝ հոկտեմբերի 11-ին, հետաձգվեց:
Երեւանի Մալաթիա-Սեբաստիա վարչական շրջանի ընդհանուր իրավասության դատարանում նիստի մեկնարկին հայտնի դարձավ, որ ներկայացել են միայն ամբաստանյալ Արթուր Այվազյանը՝ «Մանախը», եւ երկու մեղադրողները, նիստի քարտուղարը հայտարարեց, որ տուժողը, նրա ներկայացուցիչն ու ամբաստանյալի պաշտպանը հարգելի պատճառներով չեն ներկայացել: Չնայած գործով վկաները ներկայացել էին դատարան, «Մանախը» միջնորդեց նիստը հետաձգել, քանի որ չի ցանկանում առանց պաշտպանի մասնակցել դատին:
Դատական նիստը հետաձգվեց:
Ըստ մեղադրանքի՝ Արթուր Այվազյանը մարտի 30-ին ուշ երեկոյան անթաքույց արհամարհանք է դրսեւորել հասարակության նկատմամբ եւ «Ելք» դաշինքի համակիր Հ.Սարգսյանի նկատմամբ բռնություն է գործադրել. այդ ընթացքում պահել է ապօրինի ձեռք բերած գործարանային արտադրության 5,6մմ տրամաչափի օղակաձև բոցավառման որսորդական սպորտային ռազմամթերք հանդիսացող 7 փամփուշտներով լիցքավորված ինքնաշեն ակոսափող թմբուկավոր հրազեն հանդիսացող ատրճանակ:
