Առնվազն երեք դեպք է հայտնի, երբ օրենսդիրներն ընդունել են, որ իրենք գումար են ստացել Ադրբեջանի կողմից: Այս մասին հայտարարել է Գերմանիան ներկայացնող ԵԽԽՎ պատվիրակ Ֆրենկ Շվաբեն «Ադրբեջանում ժողովրդավարական հաստատությունների գործունեության մասին» զեկույցի քննարկման ժամանակ:
Նրա խոսքով՝ Ադրբեջանը ագրեսիվորեն մերժում է ժողովրդավարական արժեքները:
«Մենք պետք է իրերն իրենց անուններով կոչենք: Քաղբանտարկյալները բանտում են, հասարակական կազմակերպությունները չեն կարողանում պատշաճ կերպով աշխատել»,- նշել է նա ԵԽԽՎ աշնանային նստաշրջանի բանավեճերի ժամանակ:
Իր հերթին Լեհաստանի պատվիրակ Դոմինիկ Տարչինսկին կոչ է արել իր ադրբեջանցի գործընկերներին, հատկապես պարոն Հուսեյնովին, չհիշատակել իսլամաֆոբիան: «Մի՛ խառնեք կրոնն այս փաստաթղթի հետ»,- ասաց բանախոսը:
ԵԽԽՎ նախկին նախագահ Էնն Բրասերը նույնպես Ադրբեջանին կոչ է արել իրենցից բացի մյուսներին չմեղադրել։ «Կան բազմաթիվ թերություններ, եւ դրանք նշված են այս զեկույցում: Ադրբեջանում քաղաքացիական հասարակության ճնշում կա», - նշել է նա:
Պատվիրակության ելույթներում նշվեց նաեւ «Ադրբեջանական լվացքատան» վերջին հետաքննությունը:
Պիտեր Օմցիգթը երկու հարց է ուղղել ադրբեջանցի պատվիրակներին. «Ե՞րբ եք ազատ արձակելու պարոն Մամեդովին: Արդյո՞ք կարծում եք, որ մենք պետք է հետաքննություն սկսենք լվացքատան գործով:»:
Նա նախազգուշացրել է Ադրբեջանին հրաժարվել ուրիշներին մեղադրելուց եւ հարցրել է, թե արդյոք Ադրբեջանի իշխանությունները քայլեր կձեռնարկեն, լվացքատան գործով հետաքննություն սկսելու համար:
