«Ընտանեկան բռնության կանխարգելման մասին» օրենքի նախագիծը չի վերաբերում հայրական ապտակին կամ երեխային խրատելուն։ Այս մասին այսօր՝ հոկտեմբերի 11-ին, Ազգային ժողովում լրագրողների հետ զրույցում ասել է ՀՀ մարդու իրավունքների պաշտպան Արման Թաթոյանը։
«Քննարկում է եղել օրենքի նախագծի ընդդիմախոսների հետ, մենք փորձում ենք հասկանալ տարբեր դիրքորոշումները։ Հիմա մենք էլ պետք է աշխատենք. առավել պրոֆեսիոնալ քննարկումներ են անհրաժեշտ, մտահոգությունները վեր հանելու, փարատելու համար»,-ասաց նա:
Օմբուդսմենի խոսքով` օրենքի նպատակներից մեկը պետք է լինի ընտանեկան արժեքների խթանումը երկրում եւ ավանդական ընտանեկան արժեքների ամրապնդումը, ընտանիքի պաշտպանությունը. «Պետք է հաշվի առնել, որ ընտանիքում բռնության դեպքերը աճի միտում ունեն, դա մտահոգող է: Արդեն վիճակագրական տվյալները ներկայացվել են իրավապահ մարմնի կողմից: Ես հույս ունեմ` այս քննարկումները կբերեն ընդհանուր մոտեցումների, որովհետեւ դրանք պետք է հիմա տեղափոխել պրոֆեսիոնալ դաշտ, հասկանալու համար որոնք են այս կամ այն կողմի համար մտահոգելի հարցերը եւ աշխատել այդ ուղղությամբ»:
Թաթոյանը նշեց, որ նախագծում առավել շատ քննարկման առարկա են դարձել հոգեբանական եւ տնտեսական բռնությունների մասը: «Այդ քննարկումները, որին մենք էլ ենք մասնակցում, հենց դրան են ուղղված` փորձում ենք հասկանալ, թե որոնք են այդ մտահոգությունները եւ հնարավոր կիրառության ժամանակ, որտեղ կարող ենք խնդիր ունենալ»:
Լրագրողների հարցին` ավանդական հայկական ընտանիքի քայքայման ռիսկեր կա՞ն, նա արձագանքեց. «Ցանկացած օրենսդրական նախաձեռնություն, այդ թվում սա, չի կարող խաթարել Հայաստանում ավանդական ընտանեկան արժեքները: Առաջարկելու ենք ձեւակերպումներ, որոնք հատկապես կամրագրեն այդ նպատակները, որ օրենքը չի կարող երբեւէ խաթարել ավանդական ընտանեկան արժեքները։ Սահմանադրությամբ ընտանիքի յուրաքանչյուր անդամ ունի ֆիզիկական եւ հոգեկան անձեռնմխելիության իրավունք: Պետության համար առողջ հասարակություն ունենալու համար չափազանց կարեւոր է, որպեսզի ընտանիքի բոլոր անդամները լինեն լրիվ առողջ, որովհետեւ երեխան ունի ընտանիքում ապրելու լիիրավ իրավունք, հետեւաբար. ընտանիքում պետք է մեծանա առողջ երեխա, եւ նաեւ պետությունը պետք է ստեղծի այդ պայմանները»:
Թաթոյանը հավելեց նաեւ, որ այս օրենքը չի վերաբերելու երեխային խրատելուն, ծնողական ապտակին եւ դաստիարակությանը:
