ՀՀ արդարադատության նախարար Դավիթ Հարությունյանի նախագահությամբ այսօր Երեւանում կայացել է Անկախ պետությունների համագործակցության երկրների արդարադատության նախարարների խորհրդի 12-րդ նիստը, որին մասնակցել են Հայաստանի, Ռուսաստանի, Բելառուսի, Տաջիկստանի, Ղրղզստանի արդարադատության նախարարները:
Նախարարությունից NEWS.am-ին հայտնում են, որ ողջունելով անդամ երկրների ներկայացուցիչներին՝ նախարար Հարությունյանն ընդգծել է, որ արդարադատության նախարարների խորհուրդն, իրավամբ, ԱՊՀ կարեւոր եւ արդյունավետ գործող մարմիններից մեկն է, որի շրջանակներում քննարկվում եւ համաձայնեցվում են անդամ երկրների արդարադատության նախարարությունների իրավասության ներքո գտնվող մի շարք հարցեր:
Նախարարի խոսքով՝ ամենամյա հավաքը հնարավորություն է տալիս անդամ երկրների արդարադատության նախարարություններին հանդես գալու համատեղ առաջարկություններով, որոնք միտված են կատարելագործելու համագործակցության իրավական հիմքերը եւ ԱՊՀ շրջանակներում ստորագրված միջազգային պայմանագրերը:
Նիստի ընթացքում քննարկվել են ՄԱԿ-ի եւ ԱՊՀ երկրների միջեւ համագործակցության մասին ՄԱԿ-ի Գլխավոր ասամբլեայի 71/10 բանաձեւին, ԱՊՀ անդամ պետությունների արդարադատության նախարարությունների կողմից պետական ծառայությունների մատուցման փորձին, ԱՊՀ անդամ պետությունների նոտարական գործունեության բնագավառում օրենսդրության համապատասխանեցմանն ու ԱՊՀ բարձրագույն մարմինների միջազգային պայմանագրերի եւ որոշումների թարմացմանը վերաբերող մի շարք հարցեր: