Ադրբեջանը կարող է վերանայել իր հարաբերությունները Եվրոպայի խորհրդի հետ: Այս մասին հայտարարել է Ադրբեջանի նախագահի սոցիալ-քաղաքական հարցերով օգնական Ալի Հասանովը՝ մեկնաբանելով ԵԽԽՎ աշնանային նստաշրջանի ընթացքում Ադրբեջանի վերաբերյալ ընդունված զեկույցները, հաղորդում է «ԱզերՏԱջը»-ը:
«Սուբյեկտիվ պատկերացումների վրա հիմնված կանխակալ փաստաթղթերի ընդունումը եւ ճնշումների փորձերի ավելացումը, ստիպում են Ադրբեջանին վերանայել Եվրոպայի խորհրդի հետ հարաբերությունները», - ասել է Հասանովը՝ մեղադրելով ԵԽԽՎ-ին Ադրբեջանի նկատմամբ կողմնակալ եւ անարդար վերաբերմունքի համար:
«Եվրախորհրդարանականները ավելի լավ կլիներ մտածեին Եվրոպայի ապագայի մասին եւ իսլամաֆոբիայի, քսենոֆոբիայի, ռասայական եւ կրոնական խտրականության եւ մարդու իրավունքների կոպիտ խախտումների մասին հարցերը լուծեին», - ասել է նա:
Հիշեցնենք, որ այսօր ԵԽԽՎ-ն ընդունել է 14403 բանաձեւը «Ադրբեջանում ժողովրդավարական ինստիտուտների իրավիճակը» զեկույցի վերաբերյալ: Զեկույցի օգտին քվեարկել է 117, դեմ `18 մարդ:
