Գարեգին Բ Կաթողիկոսի հրավերով Մայր Աթոռ Սուրբ Էջմիածին ժամանած Ռուս ուղղափառ եկեղեցու պատվիրակությունը դեկտեմբերի 12-ի առավոտյան այցելել է Քանաքեռի Ս. Տիրամայր ռուսական եկեղեցի, ուր Վոլոկալամսկի միտրոպոլիտ Իլարիոնը Պատարագ է մատուցել:
Մայր Աթոռից NEWS.am-ին հայտնում են, որ արարողության ավարտին Իլարիոն միտրոպոլիտն օրհնության իր խոսքն է ուղղել ռուս համայնքի ներկայացուցիչներին: Ներկաներին ողջունել է նաեւ Մայր Աթոռ Ս. Էջմիածնի միջեկեղեցական հարաբերությունների գրասենյակի տնօրեն Տ. Հովակիմ եպիսկոպոս Մանուկյանը:
Այնուհետեւ պատվիրակները մեկնել են Մայր Աթոռ, ուր տեղի է ունեցել Ամենայն հայոց կաթողիկոսի եւ Մոսկվայի տատրիարքարանի արտաքին հարաբերությունների բաժնի նախագահ Վոլոկոլամսկի միտրոպոլիտ Իլարիոնի առանձնազրույցը:
Հանդիպումից հետո պատվիրակությունը ներկա է գտնվել Սուրբ Պատարագին, որի ընթացքում պատարագիչ Տ. Մուշեղ վարդապետ Բաբայանը: Ս. Պատարագի երգեցողությանը մասնակցել է նաեւ իտալահայ հանրահայտ մեներգչուհի Ռոզի Սվազլյանը:
Օրվա երկրորդ կեսին պատվիրակությունը մեկնել է Սեւանի Վազգենյան հոգեւոր դպրանոց, ուր Ռուս Եկեղեցու ներկայացուցիչներին ընդունել է դպրանոցի տեսուչ Տ. Շնորհք աբեղա Սարգսյանը: Իլարիոն միտրոպոլիտը հանգամանորեն պատասխանել է ուսանողներին հետաքրքրող հարցերին:
