Հայաստանի կառավարության 2018 թվականի ծրագրով պետական ապարատում կկրճատվի ավելի քան 700 մարդ։ Հոկտեմբերի 12-ին՝ լրագրողների հետ հանդիպման ժամանակ, այս մասին հայտնել է Ինովացիոն եւ ինստիտուցիոնալ հետազոտությունների կենտրոնի ղեկավար, տնտեսական գիտությունների թեկնածու Ատոմ Մարգարյանը:
Փորձագետի խոսքով՝ դա թույլ կտա տնտեսել պետական ապարատի պահպանման ընդհանուր ծախսերի 0․7 տոկոսը։ «Սահմանադրական փոփոխությունները նախատեսում են կառուցվածքային լուրջ փոփոխություններ, ինչպես նաեւ որոշ կրճատումներ եւ միավորում կառավարման համակարգում։ Սակայն ծախսերի կրճատում չի նախատեսվում»,-նշել է Մարգարյանը՝ հավելելով, որ այդ բնագավառի ծախսերը նախատեսվում է ավելացնել 4 միլիարդ դրամով՝ աշխատավարձերի բարձրացման նպատակով։ Տնտեսագետի կարծիքով Հայաստանի կառավարությունը փորձում է լուծել կոռուպցիայի խնդիրները եւ որոշ սոցիալական հարցեր։