Արժույթի միջազգային հիմնադրամը ներկայացրել է «Գլոբալ ֆինանսական կայունություն» զեկույցը։ Փաստաթղթի համաձայն՝ միջազգային տնտեսական վերականգնումը ամրացրել է կայունությունը։ Սակայն նման դրամա-ֆինանսական պայմանները թույլ ինֆլյացիայի ֆոնին բարձրացնում են միջնաժամկետ ռիսկերը, հայտնում է NTDTV-ն։
ԱՄՀ ներկայացուցիչ Թոբիաս Ադրիանի խոսքով՝ վերջին զեկույցից հետո գլոբալ ֆինանսական կայունությունը ամրապնդվել է։ Տնտեսական վերականգնումը ընդլայնվում է, եւ միջազգային շուկաները կայունանում են։ «Եվ, չնայած ջրերը հանգիստ են թվում, անկայունությունը ձեւավորվում է խորքերում։ Եթե ոչինչ չձեռնարկենք, դա կարող է սասանել գլոբալ վերականգնումն ու տնտեսական աճը հարվածի տակ դնել»,- ասել է Ադրիանը։
Նա նշել է նաեւ, որ «Մեծ քսանյակի» գումարային պարտքը կազմում է 135 տրլն դոլար։ Այդ եւ այլ երկարաժամկետ ռիսկերը կարող են նոր ֆինանսական ճգնաժամի հանգեցնել։