Կառավարության այսօրվա նիստում խոսվել է ատոմակայանի չգործող էներգաբլոկի ապամոնտաժման մասին. այն ավելի քան 40 տարի կտեւի: ՀԱԷԿ-ի 1-ին էներգաբլոկը դադարել է գործել 1988-ի երկրաշարժից հետո: Դրա փակման ռազմավարությունն ընդունվել է 2007 թվականին, իսկ ապամոնտաժման ընդհանուր արժեքը գնահատվել է 310.37 մլն դոլար: Էներգետիկայի նախարարությունն առաջարկում է փակված էներգաբլոկի որոշ սարքավորումներ օգտագործել՝ գործող բլոկն արդականացնելու համար:
Տրանսպորտի նախարարությունն էլ Հայաստանի տրանսպորտային ցանցի միավորման նախագիծ է մշակում: Պիլոտային ծրագիրն արդեն պատրաստ է, շուտով կսկսեն իրականացնել: Կարեն Կարապետյանը հետաքրքրվել է ժամկետների մասին: Վահան Մարտիրոսյանի ներկայացրած ժամկետները, սակայն, վարչապետին չեն գոհացրել. նա նախարարին հանձնարարել է չձգձգել: Նշենք, որ Կառավարությունը նախատեսում է շրջաններում, հնարավորության դեպքում՝ նաեւ ամբողջ հանրապետությունում միավորել տրանսպորտային ցանցը եւ հանձնել մեկ կամ մի քանի օպերատորի: Ենթադրվում է, որ նրանք կկարողանան ոչ մեծ գյուղերի կորուստները ծածկել միջքաղաքային գծերի եկամուտների հաշվին:
Կառավարության նիստից հետո լրագրողները Վահան Մարտիրոսյանին հարցրել են աջակողմյան ղեկով մեքենաների արգելքի՝ աղմուկ բարձրացրած խնդրի մասին: Նախարարը նշել է, որ դեռ քննարկումներ են ընթանում, եւ այդ մեքենաների շահագործման արգելքի ժամկետներ դեռ չկան: Մարտիրոսյանը նաեւ վստահեցրել է, որ օրենքի ընդունման դեպքում ձախակողմյան ղեկով ավտոմեքենաների կտրուկ թանկացում չի լինի:
«Խոսրովի անտառ» արգելոցում օգոստոսի 12-ին բռնկված հրդեհի դեպքով հարուցված քրեական գործով արդեն մեղադրյալ կա: Քննչական կոմիտեի տեղեկացմամբ՝ մեղադրանք է առաջադրվել արգելոցի մի աշխատակցի: Որպես խափանման միջոց ընտրվել է չհեռանալու մասին ստորագրությունը: Իսկ օրեր առաջ բնապահպանության նախարարն արգելոցում բռնկված հրդեհի պատճառների մասին խոսելիս չէր բացառել մարդկային գործոնի հանգամանքը: Արծվիկ Մինասյանը նշել էր, որ հրդեհը ծագել է միաժամանակ երեք տարբեր օջախներից: Դրանք միմյանցից բավական մեծ հեռավորության վրա են եղել, ինչը հիմք է տալիս եզրակացնել, որ հրդեհը չէր կարող բնածին լինել:
Հոկտեմբերի 12-ը Հայաստանում «Ծխախոտի դեմ պայքարի ազգային օր» է հայտարարվել: Առողջապահության նախարարության ներկայացրած տվյալներով՝ Հայաստանում 16 տարեկանից բարձր տղամարդկանց կեսից ավելին ամենօրյա ծխող է, կանանց շրջանում ծխախոտի օգտագործման ցուցանիշը հասնում է 5%-ի: Բացի այդ, հետազոտության արդյունքներով, մեր երկրում 15 տարեկան երեխաների 18 տոկոսը փորձել է ծխել, իսկ 4 տոկոսն արդեն կանոնավոր ծխում է:
Ծխելու դեմ պայքարը, կարծես, չի շրջանցել նաեւ օրենսդիր մարմինը: NEWS.am-ի թղթակիցն այսօր նկատել է, որ աշխատանքային օրվա ավարտին Ազգային ժողովի աշխատակիցները ծխելու համար նախատեսված տարածքներից հեռացրել են ծխախոտի ցուցանակները: Նրանք ասել են, որ հանձնարարություն են ստացել պատերից հեռացնել ցուցանակները, բայց այլ մանրամասներ չեն նշել: Ամենայն հավանականությամբ՝ այդ վայրերում այսուհետ ծխել չի թույլատրվի: Կառավարությունը ծխելու դեմ պայքարին ուղղված ակտիվ քայլեր է ձեռնարկում, իսկ հակածխախոտային օրենսդրական փաթեթը հանրությանը կներկայացվի մոտ օրերս: Նախատեսվում է հանրային վայրերում ծխելն արգելել, կարգը խախտելու դեպքում էլ խոշոր չափի տուգանքներ սահմանել:
Հայաստանում բենզինի գնի թանկացման պատճառը մինչեւ հիմա հասկանալի չէ: Հանրային խորհրդում այսօր կազմակերպված քննարկմանը ներկայացվել է տնտեսական մրցակցության պաշտպանության հանձնաժողովի ուսումնասիրությունը, որի համաձայն՝ մատակարարները վառելիքի թանկացումը պայմանավորել են ձեռքբերման գների բարձրացմամբ: Սակայն Ռուսաստանում, որտեղից հիմնականում ներկրվում է վառելիքը, գների բարձրացում չի նկատվել: Հանրային խորհուրդը որոշել է լրացուցիչ ուսումնասիրել ներկայացված վերլուծություններն ու վիճակագրական տվյալները, իսկ հետո առաջարկներ ներկայացնել կառավարությունը:
Մեկնարկել է Արամ Խաչատրյանի անվան 5-րդ միջազգային փառատոնը: Այն բացվել է հոլիվուդյան աստղ Ջոն Մալկովիչի ելույթով, որը Երեւան է ժամանել Հայաստանի պետական երիտասարդական նվագախմբի ղեկավար Սերգեյ Սմբատյանի հրավերով: Մալկովիչը հայ հանդիսատեսին ներկայացրել է հատված Էռնեստո Սաբատոյի «Հերոսների եւ գերեզմանների մասին» նովելից, հետո էլ անակնկալ մատուցել. հատված է ընթերցել Նարեկացու «Մատյան ողբերգության» պոեմի անգլերեն թարգմանությունից:
Իսկ Արամ Խաչատրյանի անվան փառատոնը կտեւի մինչեւ դեկտեմբերի 11-ը: Փառատոնի շրջանակում հոկտեմբերի 19-ին տեղի կունենա Սերժ Թանկյանի «Օկրա» թիվ 1 սիմֆոնիայի հայաստանյան պրեմիերան: Երեկ երաժիշտը Երեւան է ժամանել, ամենայն հավանականությամբ՝ իր ստեղծագործության պրեմիերային մասնակցելու: Իսկ Հայաստան այցի մասին մեր թղթակցի հարցին կատակով է պատասխանել:
Դոլարի ու եվրոյի վերելքը շարունակվում է: Հոկտեմբերի 12-ին դոլարի փոխարժեքը կազմել է 480 դրամ, եվրոյինը՝ 569, ռուբլունը՝ 8 դրամ 33 լումա, ֆունտինը՝ 634 դրամ:
Հոկտեմբերի 13-ի գիշերը եւ 15-ին շրջանների մեծ մասում սպասվում է անձրեւ եւ ամպրոպ: Օդի ջերմաստիճանը 1-2 աստիճանով կբարձրանա, իսկ հետո 2-3 աստիճանով կնվազի: Երեւանում նույնպես երեկոյան ժամերին տեղումներ կլինեն: Մայրաքաղաքում գիշերը կդիտվի +8+10, ցերեկը՝ +19+21 աստիճան տաքություն:
