Աղետների ռիսկի նվազեցման հարցում Հայաստանն առաջատար է տարածաշրջանում: Այս մասին, հոկտեմբերի 12-ին, ՀՀ արտակարգ իրավիճակների նախարար Դավիթ Տոնոյանի հետ հանդիպման ժամանակ նշել է ՄԱԿ-ի եվրոպական տարածաշրջանի աղետների ռիսկի նվազեցման գրասենյակի ղեկավար Պաոլա Ալբրիտոն:
Հայաստանի ԱԻՆ-ից NEWS.am-ին հայտնում են, որ հանդիպման ընթացքում քննարկվեցին Հայաստանում աղետների ռիսկի նվազեցման, կանխարգելման, աղետների հետեւանքների վերացման մեխանիզմների եւ մեթոդաբանության կատարելագործման հնարավորությունները՝ կիրառելով այս բնագավառում եվրոպական լավագույն փորձը:
Իր խոսքում ԱԻ նախարարը նշեց, որ պետության համար ավելի քիչ ծախսատար, բայց եւ ավելի արդյունավետ է գումար ներդնել աղետների կանխարգելման գործընթացում, քան աղետից հետո վերացնել վերջինիս հետեւանքները: Այս համատեքստում կողմերը կարեւորեցին հոկտեմբերի 13-ին «Դիմակայունություն հանուն կայուն զարգացման» եռօրյա միջազգային համաժողովի շրջանակներում ՀՀ ազգային ժողովում կայանալիք լսումները՝ «Աղետների ռիսկերի կառավարման բնագավառում ազգային կարողությունների զարգացումը» թեմայով: Սա կարող է հաջողված սկիզբ դառնալ աղետների կանխարգելման մշակույթը նաեւ օրենսդրական դաշտում ձեւավորելու համար:
Կողմերը քննարկեցին նաեւ աղետների ռիսկի նվազեցման ռազմավարությունը տարածաշրջանային եւ պետական մակարդակներից համայնքային մակարդակներում ներդնելու հիմնախնդիրը՝ նշելով, որ յուրաքանչյուր համայնքի համար կենսականորեն անհրաժեշտ է ունենալ աղետների ռիսկերի նվազեցման սեփական մարտավարությունը: Բարձր գնահատելով Հայաստանի փորձը աղետների ռիսկի նվազեցման ռազմավարության մշակման գործընթացում՝ Պաոլա Ալբրիտոն նշեց, որ տարածաշրջանային մակարդակում Հայաստանն այս հարցում, անշուշտ, առաջատարներից է:
Հանդիպման ավարտին ՄԱԿ-ի եվրոպական տարածաշրջանի աղետների ռիսկի նվազեցման գրասենյակի ղեկավարն այցելեց ՀՀ ԱԻՆ Ճգնաժամային կառավարման ազգային կենտրոն՝ ծանոթանալու «911» ծառայության գործառույթներին: