Ժիրայր Սեֆիլյանի եւ մյուսների գործով դատական նիստին այսօր՝ հոկտեմբերի 13-ին, դատավոր Տաթեւիկ Գրիգորյանը մերժեց Սեֆիլյանի պաշտպանի միջնորդությունը:
Սեֆիլյանի պաշտպան Տիգրան Հայրապետյանն ինքնաբացարկի միջնորդություն էր ներկայացրել Տաթեւիկ Գրիգորյանին: Վերադառնալով խորհրդակցական սենյակից՝ դատավորը հայտարարեց, որ միջնորդությունը մերժվում է անհիմն լինելու հիմքով:
Այնուհետեւ Տիգրան Հայրապետյանը, որն հեռացվել էր գործի վարույթից եւ այսօր կրկին ներգրավվել է որպես Ժիրայր Սեֆիլյանի պաշտպան, միջնորդեց դատարանին տրամադրել նախորդ նիստերի արձանագրությունները, որոնց մասնակցելու իրավունքից զրկված է եղել:
«Մինչեւ այս պահը մենք զրկված ենք եղել դատաքննությանը մասնակցելուց, այդ պատճառով խնդրում ենք տրամադրել արձանագրությունները ձայնային կրիչներով, որ ծանոթանանք դրանց եւ հաջորդ նիստին կարողանանք այսօր ներկայացած վկա Աշոտ Պետրոսյանին հարցեր տալ: Խնդրում եմ նիստն այս հիմքով հետաձգել»,- ասաց Տիգրան Հայրապետյանը:
Դատավորը միջնորդությունը մասնակի բավարարեց. Ձայնային կրիչները կտրամադրեն, բայց այսօրվա նիստը չի հետաձգվի: Տաթեւիկ Գրիգորյանը հիմնավորեց, որ նիստը հետաձգելը չի բխում «արդարադատության շահերից»:
Տիգրան Հայրապետյանը միջնորդեց փոխել իր պաշտպանյալի խափանման միջոց կալանավորումը:
«Սեֆիլյանն իր կյանքում այնպիսի արարք չի գործել, որը հիմք է տալիս մտածելու, որ նա կարող է խոչընդոտել դատաքննությանը կամ եթե անգամ լինի մեղադրական դատավճիռ, կարող է խուսափել պատժի կրումից: Միջնորդում եմ վերացնել կալանքի որոշումը»,- ասաց Տիգրան Հայրապետյանը: Մեղադրողներից Պետրոս Պետրոսյանն առարկեց միջնորդությանը՝ նշելով, որ Սեֆիլյանին կալանքի տակ պահելու բոլոր հիմքերն առկա են: Դատարանը, վերադառնալով խորհրդակցական սենյակից, մերժեց Տիգրան Հայրապետյանի միջնորդությունը:
Դատական նիստը շարունակվում է:
