Վարչապետ Կարեն Կարապետյանն այսօր այցելել է «Երեւան Էքսպո» ցուցահանդեսային համալիրում բացված ամենամյա «ԱրմՊրոդԷքսպո» մասնագիտացված ցուցահանդես, որին մասնակցում են գյուղատնտեսական մթերք վերամշակող ընկերություններ Հայաստանի Հանրապետությունից եւ Արցախից: Ցուցահանդեսին ներկա էր նաեւ Վրաստանի գյուղատնտեսության նախարար Լեւան Դավիթաշվիլին:
Կառավարությունից NEWS.am-ին հայտնում են, որ վարչապետը շրջել է տաղավարներով, ծանոթացել ցուցահանդեսին մասնակցող ընկերությունների ներկայացրած ապրանքատեսականիին, արտադրական, իրացման եւ արտահանման ծավալներին, ինչպես նաեւ զարգացման ծրագրերին: «ԱրմՊրոդԷքսպո»-ի բացօթյա ցուցադրության հատվածում վարչապետին են ներկայացվել գյուղատնտեսական տեխնիկայի, ինտենսիվ այգիների եւ կաթիլային ոռոգման համակարգերի հնարավորությունները: Կարեն Կարապետյանը հետաքրքրվել է նաեւ ֆերմերային տնտեսությունների հետ տարվող աշխատանքներով՝ կարեւորելով ֆերմերների վերապատրաստման ուղղությամբ շարունակական քայլերի իրականացումը:
Կառավարության ղեկավարը գոհունակությամբ նշել է, որ այս տարի «ԱրմՊրոդԷքսպո»-ն իրենից ներկայացնում է որակապես նոր ցուցահանդես՝ բիզնես տրամաբանությամբ եւ կոնկրետ արդյունքների արձանագրմամբ: Տաղավարներով շրջայցի ընթացքում վարչապետ Կարապետյանը ողջունել է գյուղատնտեսության ոլորտի ընկերությունների գործունեությունը եւ նշել, որ կառավարությունը պատրաստ է անհրաժեշտության դեպքում աջակցել նրանց ընդլայնման ծրագրերին:
«ԱրմպրոդԷքսպո» մասնագիտացված ցուցահանդեսի նպատակն է՝ ներկայացնել գյուղատնտեսական արտադրության եւ հումք վերամշակող արդյունաբերության հնարավորությունները, հաստատել գործարար կապեր եւ խթանել արտահանումը: 2017 թ. ցուցահանդեսին մասնակցում է գյուղատնտեսական մթերք վերամշակող, ագրարային ոլորտն սպասարկող եւ ծառայություններ մատուցող 110 կազմակերպություն:
