Ֆրանկֆուրտում, հոկտեմբերի 12-ին, գրքի տոնավաճառի ժամանակ ադրբեջանցիները հայկական տաղավարից գողության փորձ են արել:
ՀՀ մշակույթի փոխնախարար Ներսես Տեր-Վարդանյանը մանրամասներ է հայտնել՝ նշելով հետեւյալը.
«Հոկտեմբերի 12-ին Ֆրանկֆուրտի գրքի տոնավաճառում Հայաստանի տաղավար է մտնում երկու ադրբեջանցի, վերցնում գրադարակին ծալված վիճակում դրված Հայաստանի եւ Արցախի մի քանի քարտեզ եւ Արցախի թեմայով քաղաքական վանկարկումներով տանում դրանք իրենց հետ:
Մերոնք կարգի հրավիրելու պահանջով հետեւում են այս երկուսին մինչեւ Ադրբեջանի տաղավար, եւ ես իրենց տաղավարում արդեն ուժով հետ եմ վերցնում քարտեզներն ու վերադառնում:
Անմիջապես տաղավար եմ կանչում ցուցահանդեսի անվտանգությանը եւ ոստիկանությանը, նաեւ ցուցահանդեսի փոխտնօրեն Թոբիաս Վոսին եւ այլ պատասխանատուների: Ոստիկանությունն այս ամենն արձանագրում է եւ խոստանում միջոցներ ձեռնարկել: Ցուցահանդեսի ղեկավարությունից պահանջել եմ մի սեղանի շուրջ նստեցնել իրենց տաղավարի պատասխանատուի հետ եւ դեռ սպասում եմ:
Այս ամենը լրատվամիջոցների կողմից տեսագրված է (թեեւ ամեն կերպ փորձում էին խանգարել նկարահանելուն), եւ մենք կփորձենք այն առաջիկայում հրապարակել:
Այսօր արդեն իրենց լրատվամիջոցներում տեսնում եմ, որ իբրեւ թե իրենք մտել են ինչ-որ «սեպարատիստների» տաղավար եւ պատռել քարտեզներ: Ծանոթ ձեռագիր է: Փաստորեն այս ամենն արվում էր իրենց մամուլի համար:
Եվ սա արվում է մի երկրի կողմից, որի տաղավարում քաղաքականությունն ու քարոզչությունը գերակչռում է գրականությանն ու մշակույթին (տես մի քանի օրինակ կցված նկարներում)»:
