ՀՀ տնտեսական զարգացման եւ ներդրումների նախարարությունը Եվրամիության համաֆինանսավորմամբ իրականացվող «Աջակցություն Հայաստանում ՓՄՁ զարգացմանը» նախագծի շրջանակում, Գերմանական միջազգային համագործակցության ընկերակցության աջակցությամբ նախաձեռնել է Հայաստանում ինովացիոն էկոհամակարգի քարտեզագրման եւ ինովացիոն ոլորտի ռազմավարության մշակման ուղղությամբ աշխատանքները:
Հոկտեմբերի 13-ին ՀՀ տնտեսական զարգացման եւ ներդրումների նախարար Սուրեն Կարայանն ընդունել է ծրագրի միջազգային փորձագետներ Դանիել Կոսնիտանին եւ Մայքլ Գուֆին:
Նախարարն ընդգծել է ինովացիոն ոլորտի արդիական ռազմավարության եւ դրա հիման վրա մշակված միջոցառումների կարեւորությունը` Հայաստանի ամբողջ տնտեսության մրցունակության եւ դրան հասնելու ուղիները նախանշելու տեսակետից՝ նշելով, որ նանոտեխնոլոգիաները կարող են Հայաստանի տնտեսության զարգացման հիանալի խթան դառնալ:
Նախարար Սուրեն Կարայանի եւ նախարարի տեղակալ Էմիլ Տարասյանի՝ նախագծի միջազգային եւ տեղական փորձագետների հետ հանդիպման ժամանակ համառոտ ներկայացվել են նախագծի իրականացման նպատակները, խնդիրները, Հայաստանում պետական եւ մասնավոր հատվածի, գիտական եւ տեխնոլոգիական հանրության եւ միջազգային դոնոր կազմակերպությունների ներկայացուցիչների հետ ունեցած քննարկումների արդյունքները:
Սուրեն Կարայանը հաջողություն է մաղթել մեկնարկած աշխատանքներին, որոնք կամփոփվեն 2017թ. վերջին` ինովացիոն ոլորտի ռազմավարության նախնական նախագծի տեսքով:
