Հայաստանի համար ՀԱՊԿ-ի սպառնալիքը ոչ թե Ղազախստանի նախագահի հայտարարություններն են, այլ այն, որ Հայաստանի իշխանություններն անվտանգության հարցն ամբողջովին կապակցել են այդ կազմակերպության հետ ու այն ամբողջովին լուծված համարել։ Լրագրողների հետ հանդիպման ժամանակ հոկտեմբերի 13-ին նման տեսակետ է հայտնել ՀԱԿ ներկայացուցիչ ՀՀՇ վարչության անդամ Հովհաննես Իգիթյանը։
Նրա կարծիքով՝ Հայաստանի իշխանությունները այնքան էլ լավ չեն տիրապետում իրավիճակին։ «Նրա՛նք չեն որոշել մտնել այնտեղ, նրա՛նք չեն որոշելու դուրս գալ այնտեղից, ու նրանք չէ, որ պետք է անվտանգության ապահովման այլընտրանքային ուղի որոնեն»,- ասել է Իգիթյանը՝ միաժամանակ հավելելով, որ Կրեմլում գոհ են այդ համակարգից։ Ընդ որում ՀԱԿ ներկայացուցիչը նշել է, որ ՀԱՊԿ ստեղծման մասին որոշումը կայացրել են Ռուսաստանի իշխանությունները, ու տվյալ կազմակերպությունը արտացոլում է միայն Մոսկվայի աշխարհքաղաքական շահերը։
