Հայաստան–ԵՄ նոր համաձայնագիրն այնքան խորը չէ, ինչպես Ուկրաինայի, Վրաստանի եւ Մոլդովայի հետ կնքված ԵՄ ասոցացման համաձայնագրերը, բայց այն մեզ համար արդեն իսկ շատ կարեւոր փաստաթուղթ է։ Այս մասին NEWS.am-ի հետ զրույցում ասել է քաղաքագետ Ստեփան Գրիգորյանը:
«Պարզ է, որ այս պայմանագիրը չէր կարող լինել այնքան խորը, ինչպես ասոցացման պայմանագիրն է, որը Մոլդովայի, Ուկրաինայի եւ Վրաստանի դեպքում է, բայց պայմանագիրն արդեն իսկ կարեւոր է, քանի որ մի շարք ոլորտներում ԵՄ–ի հետ համամործակցության նոր հիմքեր կլինեն։ Քաղաքական մասը շատ կարեւոր է Հայաստանի համար, դատական ռեֆորմ, վիզաների հեշտացման գործընթացում առաջընթաց, մարդու իրավունքների, օրենքի գերակայություն, բոլոր հարցերն այստեղ ընդգրկված են»,–ասել է Ստեփան Գրիգորյանը։
Մինչ ԵՏՄ–ին Հայաստանի անդամակցելն առաջարկված ԵՄ-ի հետ ասոցացման համաձայնագրի հետ համեմատելով՝ քաղաքագետն ասաց. «Նախկին փաստաթուղթը, որ առաջարկված էր եւ մենք մտանք ԵՏՄ, սա չի կարող նախկինի նման այդչափ խորը փաստաթուղթ լինել։ Ասոցացման առումով ավելի թույլ է, բայց այդուհանդերձ շատ կարեւոր պայմանագիր է»։
Ստեփան Գրիգորյանի կարծիքով՝ այս անգամ Հայաստանը կստորագրի համաձայնագիրը, ինչին պետք է նպաստի նաեւ ողջ հայ հասարակությունը։
Հիշեցնենք, որ Եվրոպական Միության խորհուրդը հրապարակել է CEPA-ն կամ Համապարփակ եւ ընդլայնված գործընկերության համաձայնագիրը։ Նախատեսվում է, որ այն ստորագրվելու է Հայաստանի հետ նոյեմբերին Բրյուսելում՝ ԱլԳ գագաթնաժողովի շրջանակում, եթե որեւէ խոչընդոտ չլինի: