Գարեգին Բ Ամենայն Հայոց Կաթողիկոսը հոկտեմբերի 15-ին Մայր Աթոռ Սուրբ Էջմիածնում ընդունել է Շվեյցարիայի Աստվածաշնչային ընկերության գլխավոր քարտուղար Էվա Թոմիի եւ Գերմանիայի Աստվածաշնչային ընկերության անդամ, Շտուտգարտի Լյութերական եկեղեցու հոգեւոր տեսուչ Էքհարտ Շուլցբերգի գլխավորած պատվիրակությանը` ուղեկցությամբ Հայաստանի Աստվածաշնչային ընկերության գլխավոր քարտուղար Գերաշնորհ Տ. Եզնիկ արքեպիսկոպոս Պետրոսյանի եւ ծրագրերի ղեկավար Արշավիր Գաբուճյանի:
Մայր Աթոռի տեղեկատվական համակարգից NEWS.am-ին հայտնումե ն, որ պատվիրակության Հայաստան այցի նպատակն է ծանոթանալ Հայաստանի Աստվածաշնչային ընկերության ծրագրերին եւ առկա համագործակցության հեռանկարներին:
Հանդիպմանը Եզնիկ Սրբազանը Վեհափառ Հայրապետին ներկայացրեց Շվեյցարիայի եւ Գերմանիայի Աստվածաշնչային ընկերությունների միացյալ պատվիրակության անդամներին` մասնավորապես երախտագիտությամբ անդրադառնալով այն օժանդակությանը, որ նրանք բերում են Հայաստանի Աստվածաշնչային ընկերության ծրագրերին:
Այնուհետեւ ներկաներին իր օրհնությունը բաշխեց Ամենայն Հայոց Կաթողիկոսը` ուրախություն հայտնելով պատվիրակության Հայաստան այցի առիթով:
Վեհափառ Հայրապետն անդրադարձ կատարեց Հայոց Եկեղեցու առջեւ ծառացած հիմնական մարտահրավերներին` ժողովրդի քրիստոնեական դաստիարակությանը, եկեղեցականների պատրաստությանը, հնամենի տաճարների վերականգնմանն ու պահպանությանը եւ նոր եկեղեցիների կառուցմանը: Նորին Սրբությունը գոհունակությամբ նշեց, որ այսօր ժողովուրդը բավարար քրիստոնեական գիտելիքներ ունի եւ նրա հավատը լուսավորված է` դրանում կարեւոր նկատելով նաեւ Հայաստանի Աստվածաշնչային ընկերության ներդրումը:
Խոսելով Հայաստանի Աստվածաշնչային ընկերության ակտիվ գործունեության եւ պարբերաբար կազմակերպվող հանրօգուտ նախաձեռնությունների մասին` Հայոց Հայրապետն ընդգծեց, որ դա մեծ զորակցություն է Հայոց Եկեղեցուն, ընկերության աշխատանքի շնորհիվ շատ հայորդիներ ոչ միայն քաջածանոթ են Աստվածաշնչին, այլեւ ունեն այն իրենց օջախներում:
Նորին Սրբությունը նաեւ իր գնահատանքը հայտնեց ի դեմս ներկաների տարբեր աստվածաշնչային ազգային ընկերություններին, Քրիստոնեական Եկեղեցիներին եւ հասարակական կազմակերպություններին այն աջակցության համար, որ ցուցաբերվում է Հայաստանի Աստվածաշնչային ընկերությանը` ժամանակի մեջ հաղթահարելու առկա մարտահրավերները: Ամենայն Հայոց Կաթողիկոսը հորդորեց նրանց շարունակել ընդլայնել համագործակցությունը եւ նպաստել օգտակար ծրագրերի իրականացմանը:
Այնուհետեւ Նորին Սրբությանը ողջունեցին տիկին Էվա Թոմին եւ Վերապատվելի Էքհարտ Շուլցբերգը: Վերջիններս անդրադարձան Աստվածաշնչային ընկերությունների կարեւոր առաքելությանը, ապա ներկայացրեցին իրենց տպավորությունները Հայաստանի Աստվածաշնչային ընկերության մի շարք ծրագրերի վերաբերյալ, որոնց առիթ ունեցան մասնակցելու անցնող օրերին:
Պատվիրակությունը Մայր Տաճարում մասնակցեց նաեւ Ս. Պատարագի արարողությանը:
