Աշխարհում սովյալների թիվը նորից սկսել է աճել եւ 2016 թվականին կազմել է 815 մլն մարդ։ Դրա պատճառն առաջին հերթին զինված հակամարտություններն են։ Այս մասին «ՌԻԱ Նովոստի»–ն հայտնել է ՄԱԿ պարենի եւ գյուղատնտեսության կազմակերպության գլխավոր տնօրեն Ժոզե Գրացիանու դա Սիլվան։
«Ցավոք, սովյալների թիվը սկսել է նորից աճել վերջին տասնամյակներում գրանցած առաջընթացից հետո։ ՄԱԿ պարենի եւ գյուղատնտեսության կազմակերպության գնահատականներով՝ 2016 թվականին 815 մլն մարդ քաղցել է, ինչը 38 միլիոնով շատ է 2015-ի հետ համեմատ։ Մեծամասամբ դա պայմանավորված է աշխարհում զինված հակամարտությունների եւ տարերային աղետների կտրուկ աճով։ Վերջին տասնամյակում նման հակամարտությունների թիվը կտրուկ աճել է, եւ դրանք ավելի բարդ ու անլուծելի են դարձել իրենց բնույթով»,– ասել է նա։
Գրացիանու դա Սիլվայի խոսքով՝ հակամարտությունները հաճախ բերում են տնտեսական հետընթացի, գնաճի եւ վնաս են հասցնում արտադրանքի արդյունաբերությանը՝ զգալիորեն բացասաբար անդրադառնալով գյուղաբնակների ապրուստի միջոցների վրա։