ՀՀ ԱԻՆ Հիդրոմետ ծառայությունը զգուշացնում է. հոկտեմբերի 16-ին առանձին շրջաններում՝ հատկապես Լոռիում, Տավուշում եւ Գեղարքունիքում քամու ուժգնացման վերաբերյալ (25-30մ/վ արագություն) հնարավոր է կոտրվեն ծառեր եւ վնասվեն տանիքներ:
«Ուստի հորդորում ենք բնակչությանը, մնալ շինությունների ներսում: Երեւանում եւ հանրապետության մյուս հատվածներում նման ուժեղ քամիներ չեն կանխատեսվում»,-Facebook-ի իր էջում գրել է ԱԻՆ-ի մամուլի խոսնակ Նանա Գնդոյանը:
Միաժամանակ, ԱԻՆ-ը քաղաքացիներին կոչ է արել պահպանել զգուշություն եւ հնարավորինս քիչ գտնվել դրսում:
Նշենք, որ երեւանյան դպրոցներից մեզ տեղեկացրին, որ ԿԳՆ-ն զգուշացել է իրենց, որ երեխաները դրսում չլինեն: Հնարավոր է, որ տարրական դասարանների աշակերտները դասերը կիսատ թողնեն եւ տուն գնան:
Մասնավորապես, ԿԳՆ հանրակրթության վարչության պետ Աշոտ Արշակյանը նշել է, որ ԱԻՆ-ից զգուշացում են ստացել, որ սպասվում է ուժեղ քամի եւ այդ մասին պետք է զգուշացնեն դպրոցներին։ Իրենք էլ դպրոցներին զգուշացրել են, որ ԱԻՆ-ի կողմից նշված ժամանակահատվածում՝ ժամը 14-15-ին, դրսում երեխա չլինի։ ԿԳՆ-ից դպրոցներին զգուշացրել են, որ ով շուտ է վերձացնում դասը, թող տուն գնան, իսկ որոնք ուշ են վերջացնում, պետք է մնան դպրոցում մինչեւ քամու ավարտը:
