Հայաստան–ԵՄ նոր համաձայնագրի դեպքում խնդիրը ոչ այնքան ստորագրելն է, որքան այն իրականացնելը։ Այս մասին NEWS.am-ի հետ զրույցում նշել է նախկին պատգամավոր, Մարդկային զարգացման միջազգային կենտրոնի գործադիր տնօրեն Թեւան Պողոսյանը։
«Ես միշտ ասում եմ՝ հավատում եմ, որ այն պետք է ստորագրվի։ Խնդիրը ոչ այնքան ստորագրություն դնել–չդնելու մեջ է, որքան այն, թե ինչպես ենք այն մենք իրականացնելու»,–ասաց Թեւան Պողոսյանը՝ հույս հայտնելով, որ ամեն դեպքում ֆորսմաժորային վիճակ չի ստեղծվի, որը կխոչընդոտի:
«Հայաստանն էլ, Եվրամիությունն էլ սեպտեմբերի 3–ի դասերը քաղել են, երկրորդ անգամ նման ճանապարհով ոչ մեկ չի պատրաստվում անցնել։ Ես վստահ եմ, որ կստորագրվի, եթե չլինի ֆորսմաժորային վիճակ՝ ասենք պատերազմական ինչ–որ խնդիր, կամ որ Եվրամիությունը հրաժարվի որեւէ պատճառով»,-ընդգծեց Պողոսյանը:
Նախկին պատգամավորի խոսքով՝ ԵՏՄ–ին Հայաստանի անդամակցությունը որեւէ կերպ չի խոչընդոտում այս համաձայնագրին միանալուն, քանի որ այն նույնիսկ ասոցացման համաձայնագիր չէ. «Մի միության հետ անդամ ենք, մյուսում նույնիսկ ասոցացված չենք։ Ես վստահ եմ՝ բոլոր այն մտահոգությունները, որ մեկը թույլ կտա թե ոչ, որ այն ստորագրվի, նախնական ստուգվել են մինչեւ նախաստորագրվելը։ Նախաստորագրությունը այս պարագայում հաստատում է, որ կստորագրվի։ Ավելի շատ պետք է խոսենք, որ այն չմնա թղթային պայմանավորվածությունների մակարդակում եւ մեր երկրի շահերից բխող չբխող գործողություններ չլինեն»։
Նշենք, որ Հայաստան-ԵՄ նոր համաձայնագրի տեքստը հրապարակվել է: Նախատեսվում է, որ փաստաթուղթը կստորագրվի նոյեմբերին, Բրյուսելում: