Հայաստանի եւ Ադրբեջանի նախագահների հանդիպումն ընթացել է կառուցողական մթնոլորտում։ Այս մասին ասված է Հայաստանի եւ Ադրբեջանի ԱԳ նախարարների եւ ԵԱՀԿ ՄԽ համանախագահների համատեղ հայտարարության մեջ։
Սերժ Սարգսյանի եւ Իլհամ Ալիեւի հանդիպումը տեղի է ունեցել հոկտեմբերի 16-ին Ժնեւում՝ ԵԱՀԿ Մինսկի խմբի համանախագահներ Իգոր Պոպովի (Ռուսաստան), Ստեֆան Վիսկոնտիի (Ֆրանսիա), Էնդրյու Շոֆերի (ԱՄՆ) եւ ԵԱՀԿ գործող նախագահի անձնական ներկայացուցիչ Անջեյ Կասպրշիկի միջնորդությամբ: Հանդիպմանը մասնակցել են նաեւ Հայաստանի եւ Ադրբեջանի արտգործնախարարներ Էդվարդ Նալբանդյանը եւ Էլմար Մամեդյարովը։ Ավելի ուշ նախագահները բանակցությունները շարունակել են առանձին:
«Հանդիպումն անցնել է կառուցողական մթնոլորտում,- ասվում է հայտարարության մեջ:- Նախագահները համաձայնության են եկել միջոցներ ձեռնարկել բանակցային գործընթացն ակտիվացնելու եւ շփման գծում լարվածությունը թուլացնելու ուղղությամբ: Համանախագահները գոհունակություն են հայտնել երկարատեւ ընդմիջումից հետո վերսկսված այս անմիջական բանակցություններից: Նրանք պատրաստ են աշխատել կողմերի հետ՝ որպես միջնորդ հանդես գալու Լեռնային Ղարաբաղի հիմնախնդրի խաղաղ կարգավորման հարցում:
Մոտ ապագայում համանախագահները կկազմակերպեն աշխատանքային հանդիպումներ արտգործնախարարների հետ»: