Եթե մարդիկ իշխանատենչ են եւ իշխանություն են ուզում, պետք է սկսեն ներքեւից։ Այս մասին NEWS.am–ի հետ զրույցում ասել է ԱԺ ՀՀԿ խմբակցության ղեկավար Վահրամ Բաղդասարյանն՝ անդրադառնալով նոյեմբերի 5-ին սպասվող ՏԻՄ ընտրություններին «Ելք»–ի չմասնակցելու որոշմանը։
Նշենք, որ ավելի քան 60 համայնքում ընտրություններ են, որին քաղաքական ուժերից մասնակցում են ՀՀԿ-ն, ԲՀԿ-ն եւ ՀՅԴ-ն։
Նշենք, որ «Ելք» դաշինքի պատգամավոր Մանե Թանդիլյանը հայտարարել էր, որ վերլուծելով 2017 թվականի խորհրադարանական ընտրությունների մարզային արդյունքները՝ հանգել են այն եզրակացության, որ ՏԻՄ ընտրություններին մասնակցելուց առաջ անհրաժեշտ է որոշակի կառուցվածքային փոփոխություններ իրականացնել։ Այս անգամ որոշել են չմասնակցել ընտրություններին։
«Եթե մարդիկ իշխանտենչ են եւ իշխանություն են ուզում, պետք է դա սկսեն ներքեւից։ Այդպիսով վստահության քվե կունենան հանրության մոտ որեւէ պահանջ դնելու։ «Ելք»–ն իր ռեսուրսը գնահատել ու տեսել է՝ պետք չէ առանց ռեսուրսի գալ իշխանության, որը ես համարում եմ իշխանատենչություն»։
Վահրամ Բաղդասարյանն ասել է, թե այն մեկնաբանությունները, որ ՀՀԿ–ն է ամայացրել քաղաքական դաշտը եւ քվե հավաքագրելու իր ձեռագրով խոչընդոտներ ստեղծել ազատ մրցակցության համար, պատրվակ է։
«Դա պատրվակ է։ Եթե կարողանում է իշխանությունը այդպիսի իրավիճակ ստեղծել, ուրեմն հանրության վստահությունն ունի։ Այսօրվա քաղաքական դաշտը երբեք այսչափ քաղաքականացված չի եղել»,ասել է պատգամավորը։
