Հայաստանի եւ Ադրբեջանի նախագահները կրկին հանդիպել են: Սարգսյան-Ալիեւ հանդիպումը Ժնեւում նախաձեռնել էին ԵԱՀԿ Մինսկի խմբի համանախագահ երկրները: Սերժ Սարգսյանն ու Իլհամ Ալիեւը նախ հանդիպել են ԱԳ նախարարների եւ ԵԱՀԿ ՄԽ համանախագահների մասնակցությամբ, իսկ հետո առանձնազրույց են ունեցել:
Հանդիպումից հետո եռանախագահները համատեղ հայտարարություն են տարածել՝ նշելով, որ Սերժ Սարգսյանն ու Իլհամ Ալիեւը համաձայնել են քայլեր ձեռնարկել՝ ղարաբաղյան հակամարտության կարգավորման բանակցություններն ակտիվացնելու եւ շփման գծում լարվածությունը թուլացնելու ուղղությամբ: Առաջիկայում արդեն Մինսկի խմբի համանախագահներն աշխատանքային հանդիպումներ կկազմակերպեն երկու երկրների ԱԳ նախարարների հետ: Սերժ Սարգսյանն ու Իլհամ Ալիեւը վերջին անգամ հանդիպել էին 2016 թվականին: Մայիսին նրանք հանդիպել էին Վիեննայում, հունիսին՝ Սանկտ Պետերբուրգում: Ադրբեջանական կողմը, սակայն, մինչեւ հիմա չի կատարում այդ հանդիպումների ընթացքում ձեռք բերված համաձայնությունները:
Մոսկվայի կենտրոնում կրկին հայ գործարար է սպանվել: Անհայտ անձը 38-ամյա Գեորգի Ակոպջանովի ուղղությամբ առնվազն հինգ կրակոց է արձակել: Ստացած վնասվածքներից նա տեղում մահացել է: Տեսահսկման խցիկները ֆիքսել են սպանության պահը: Ռուսական իրավապահ աղբյուրների փոխանցմամբ՝ հանցագործությունը նման է պատվերով սպանության: Քրեական գործ է հարուցվել՝ սպանություն եւ զենքի ապօրինի շրջանառություն հոդվածներով:
Արմեն Ջիգարխանյանը սկանդալի կենտրոնում է հայտնվել: Լրատվամիջոցները նախ տեղեկացրեցին, որ դերասանի կինը՝ Վիտալինա Ցիմբալյուկ-Ռոմանովսկայան, դիմել է Մոսկվայի իրավապահներին եւ խնդրել օգնել՝ գտնել ամուսնուն: Նշվում էր, որ ամուսինները վիճել են, եւ Ջիգարխանյանն ընկերների հետ հեռացել է տնից: Հետո էլ տեղեկություն հայտնվեց, որ Արմեն Ջիգարխանյանը ոստիկանությունում հաղորդում է ներկայացրել Վիտալինայի դեմ՝ նրան մեղադրելով, իբր, իրեն սպանելու փորձի մեջ՝ ունեցվածքին տիրանալու նպատակով: Ի դեպ, վերջին տարիներին Ջիգարխանյանն իր ունեցվածքը գրանցել է երիտասարդ կնոջ անունով: Այս խճճված պատմությանն այսօր եւս մեկ լուր է ավելացել. հաղորդավարուհի Օքսանա Պուշկինան հայտնել է, որ դերասանը պատրաստվում է բաժանվել կնոջից եւ հիմա ապահարզանի փաստաթղթերն է նախապատրաստում:
Նշենք, որ Ջիգարխանյանն այժմ հիվանդանոցում է: Բժիշկները նրա վիճակը միջին ծանրության են գնահատում: Ասում են՝ դերասանը չի ցանկանում տեսնել կնոջը, նրան նույնիսկ հիվանդասենյակ չի թողել: Ռուսական լրատվամիջոցներից մեկի թղթակցի հետ զրույցում Արմեն Ջիգարխանյանը խոստացել է ամեն ինչ պարզաբանել, երբ դուրս գրվի հիվանդանոցից:
Իրաքի կառավարական զորքերը վերահսկողություն են հաստատել Քիրքուքի 2 նավթահանքերի եւ ռազմաբազայի նկատմամբ: Քրդական ռազմականացված խմբավորումների հրամանատարությունը հայտարարել է, որ Քիրքուքի վրա Իրաքի զինվորականների հարձակումը նշանակում է պատերազմ հայտարարել: Քրդերը նաեւ զգուշացրել են, որ Իրաքի կառավարությունը թանկ կվճարի հակամարտություն նախաձեռնելու համար:
Մինչ այդ Իրաքի նախագահն ակտիվ բանակցում է քրդական ինքնավարության իշխանությունների հետ: Քրդական իշխանությունները մերժել են անկախության հանրաքվեի արդյունքները չեղարկելու՝ Բաղդադի պահանջը: Նրանք, սակայն, պատրաստակամություն են հայտնել խաղաղ միջոցներով հասնել խնդրի հանգուցալուծմանը: Բաղդադի եւ քրդական ինքնավարության միջեւ Քիրքուքի համար պայքարը սրվել է Իրաքյան Քուրդիստանի անկախության հանրաքվեից հետո: Սեպտեմբերի 25-ին կայացած հանրաքվեի արդյունքում անկախությանը կողմ է քվեարկել բնակչության ավելի քան 93%-ը:
«Դիլիջան ազգային պարկ»-ում օրեր առաջ արտակարգ դեպք է տեղի ունեցել: Մի խումբ քաղաքացիներ վիճաբանել են պարկի «Շամախյան» տեղամասի անվտանգության աշխատակիցների հետ, քաշքշել միմյանց եւ հրկիզել հենակետի վագոն-տնակը: Քննչական կոմիտեի տեղեկացմամբ՝ 10-15 անձինք «ՈՒԱԶ» մակնիշի մի քանի մեքենայով մոտեցել են «Դիլիջան ազգային պարկ»-ի «Շամախյան» տեղամասի հսկիչ կետին եւ դժգոհություն հայտնել հսկիչ անցագրային կետի տեղադրման կապակցությամբ: Հսկիչների ցուցմունքների համաձայն՝ նրանցից մեկը փայտ է վառել, գցել վագոն-տնակն ու փախուստի դիմել: Քննություն է տարվում՝ դեպքին մասնակից անձանց ինքնությունը պարզելու եւ վագոն-տնակը հրկիզողին հայտնաբերելու ուղղությամբ:
Արտակարգ իրավիճակների նախարարությունն այսօր հայտնեց հանրապետության առանձին շրջաններում ուժեղ քամիների մասին: Քամու ուժգնացում էր սպասվում, մասնավորապես, Լոռու, Տավուշի եւ Գեղարքունիքի մարզերում: ԱԻՆ-ը նախազգուշացրել էր, որ ուժեղ քամիների հետեւանքով հնարավոր է ծառեր կոտրվեն, տանիքներ վնասվեն, եւ բնակչությանը հորդորել հնարավորինս քիչ մնալ դրսում: Կրթության նախարարությունն իր հերթին մարզային դպրոցների ղեկավարներին կոչ էր արել հետեւել, որ աշակերտները դրսում չմնան:
Այս հայտարարությունները խուճապ են առաջացրել ինչպես մայրաքաղաքում, այնպես էլ մարզերում: Եվ չնայած զգուշացումը միայն երեք մարզերի բնակիչներին էր վերաբերում, Երեւանում բազմաթիվ ծնողներ երեխաներին շտապ տուն են տարել դպրոցից ու մանկապարտեզից, մարզերում էլ ուսուցիչներն են տուն ուղարկել երեխաներին:
Դոլարի աճը չի դադարում, իսկ եվրոն թուլանում է: Հոկտեմբերի 16-ին դոլարի փոխարժեքը կազմել է 481 դրամ, եվրոյինը՝ 567, ռուբլունը՝ 8 դրամ 41 լումա, ֆունտինը՝ 640 դրամ:
Հոկտեմբերի 17-ի գիշերը Սյունիքում եւ Արցախում սպասվում է անձրեւ եւ ամպրոպ, 18-21-ը՝ առանց տեղումների եղանակ: Հոկտեմբերի 17-ին օդի ջերմաստիճանը 3-5 աստիճանով կնվազի: Երեւանում տեղումներ չեն սպասվում: Մայրաքաղաքում գիշերը կդիտվի +3+5, ցերեկը՝ +15+17 աստիճան տաքություն: