«Իսլամական պետություն» ահաբեկչական խմբավորման գրոհայինները երկուշաբթի երեկոյան Քիրքուքից հյուսիս-արեւմուտք գտնվող 2 գյուղ են գրավել: Այս մասին հայտնում է «Աս Սումարիա» հեռուստաալիքը:
Գրավված գյուղերը գտնվում են Քիրքուքը քրդական ինքնավարության մայրաքաղաք Էրբիլի հետ կապող մայրուղուց ոչ հեռու: Տեղացիներն այս բնակավայրերից փախել են:
Հեռուստաալիքը հաղորդում է, որ գյուղերի գրավումը բնակչության համար անսպասելի էր: Փորձագետների կարծիքով՝ արմատականներն օգտվել են այս նահանգի անվտանգության համար պատասխանատու փեշմարգայի զինված խմբավորումների եւ Իրաքի բանակի միջեւ ծագած կոնֆլիկտից:
Երկուշաբթի Իրաքի զինվորականները, փաստացի փեշմարգայի դիմադրությանը չհանդիպելով, վերահսկողությունը վերահաստատել էին Քիրքուք նահանգի մի շարք առանցքային նավթային օբյեկտների, ռազմաբազայի եւ նահանգի կենտրոն Քիրքուքի վրա: Քիրքուք նահանգի պատկանելության շուրջ վեճը Բաղդադի եւ քրդական ինքնավարության միջեւ սրվել է սեպտեմբերի 25-ին առանց Իրաքի իշխանությունների համաձայնության քրդերի անցկացրած անկախության հանրաքվեից հետո:
