Իրաքի նախագահ Ֆուադ Մասումը կոչ է արել Իրաքի կենտրոնական կառավարությանը եւ Իրաքի Քուրդիստանի ղեկավարությանը անմիջապես վերսկսել երկխոսությունը: Այս մասին հաղորդում է Sky News Arabia-ն:
«Բոլորին հարկավոր է զսպվածություն ցուցաբերել, որպեսզի վերսկսեն երկխոսությունը»,- հեռուստատեսային ուղերձով ասել է Իրաքի նախագահը:
Նրա խոսքով՝ նման երկխոսությունը պետք է իրականացվի հարգելով Սահմանադրությունը եւ այլ գործող օրենքները: «Այս իրավիճակում, երբ տարբեր կոչեր են հնչում, մենք, մեր հերթին, կոչ ենք անում հետեւել Սահմանադրությանը որպես հետագա ցանկացած գործողությունների հիմք», - ասել է նախագահը:
Մասումի խոսքով՝ Իրաքի ղեկավարությունը փորձել է փոխզիջման հասնել, սակայն ջանքերը չեն պսակվել հաջողությամբ Քուրդստանի՝ անկախության վերաբերյալ հանրաքվե անցկացնելու միակողմանի որոշման պատճառով:
Մեկնաբանելով Քիրքուքի իրավիճակը՝ նա նշել է, որ այնտեղ քրդական փեշմարգա ուժերի առկայությունը օրինական է, սակայն հանրաքվեից հետո տարաձայնություններ են առաջացել:
«Պետք է կանխել Քիրքուքում տեղի ունեցող խախտումները եւ բնակիչներին իրենց տներ վերադարձնել», - ավելացրել է Իրաքի նախագահը: