Երեւանում 2016թ. մայիսի 13-ի գիշերը «Բրավո» տաքսի ծառայության ընկերության տնօրեն Լեւոն Ավետիսյանի տան վրա հարձակման ժամանակ ստացած մարմնական վնասվածքներից մահացած Հրաչյա Ֆալանջյան գործով տուժող չի ճանաչվել: Երեւանի Շենգավիթ վարչական շրջանի ընդհանուր իրավասության դատարանը մերժել է Հրաչյա Ֆալանջյանի մոր միջնորդությունը, որով նա դատարանին խնդրել էր մահացած որդուն տուժող, իսկ իրեն տուժողի ներկայացուցիչ ճանաչել: Տիկին Մարիետան պնդում է, որ իր որդին գողության նպատակով չի մտել Լեւոն Ավետիսյանի տուն, ավելին, նրան սպանել են այլ վայրում եւ դիակը տեղափոխել այդ տուն:
Նշենք, որ Հրաչյա Ֆալանջյանի մահվան գործով հարուցված քրեական գործը կարճվել է:
Նշենք, որ այս գործով սեպտեմբերի 6-ին նոր մեղադրող է ներգրավվել: Ավելի վաղ տեղեկացրել էինք, որ Երեւանում 2016թ. մայիսի 13-ի գիշերը «Բրավո» տաքսի ծառայության ընկերության տնօրենի տան վրա ավազակային հարձակում է տեղի ունեցել: Ավազակային հարձակման մեջ կասկածվում են Հրաչյան ու Էդգար Մկրտչյանը: Հրաչյա Ֆալանջյանը ավազակային հարձակման ընթացքում տեղի ունեցած ծեծկռտուքի հետեւանքով մահացել է, Էդգարը կալանավորված է:
Էդգար Մանուկյանին մեղադրանք է առաջադրվել ՀՀ քրեական օրենսգրքի 175-րդ հոդվածի 3-րդ մասի 3-րդ կետով եւ 177-րդ հոդվածի 1-ին մասով, նրա նկատմամբ որպես խափանման միջոց է ընտրվել կալանավորումը, իսկ Հրաչյա Ֆալանջյանի նկատմամբ՝ ՀՀ քրեական օրենսգրքի 175-րդ հոդվածի 3-րդ մասի 3-րդ կետով, 235-րդ հոդվածի 1-ին մասով և 34-104-րդ հոդվածի 2-րդ մասով քրեական հետապնդում չի իրականացվել` նրա մահվան հիմքով: