Կառավարության մեկնաբանությունը՝ կապված ձերբակալվածների պահելու վայր պատգամավորի անարգել մուտքի իրավունքին, կարելի է կոչել որպես «չըխկլը փակ-չըկլը բաց»-ի դրույթ: Այս մասին, այսօր՝ հոկտեմբերի 18-ին, ԱԺ պետաիրավական եւ մարդու իրավունքների պաշտպանության հանձնաժողովի նիստում հայտարարել է «Ելք» խմբակցության ղեկավար Նիկոլ Փաշինյանը:
Նա ներկայացրել է «Ձերբակալված եւ կալանավորված անձանց պահելու մասին» Հայաստանի Հանրապետության օրենքում փոփոխություն կատարելու մասին օրենքի նախագիծը:
Նրա խոսքով, օրենքը հստակ սահմանում է, որ առանց հատուկ թույլտվության ձերբակալվածների պահելու վայր անարգել կարող են մուտք գործել ի թիվս այլոց, նաեւ պատգամավորները. «Երկար տարիներ այս հարցում խնդիրներ են ծագում, ՔԿՀ ղեկավարությունը խոչընդոտներ է հարուցում պատգամավորների առջեւ: Պատգամավորը կարող է մուտք գործել ՔԿՀ ցանկացած անկյուն, բայց պրակտիկայում լինում է, որ գնում ենք կոնկրետ X խուց ենք ուզում մուտք գործել, մեզ ասում են՝ չենք կարող թույլ տալ, որովհետեւ այնտեղ կա կալանավորված անձ, որի հետ տեսակցությունները սահմանափակված են: Բայց մենք չենք ուզում այդ անձին տեսակցել, ուզում ենք մուտք գործել ՔԿՀ-ի այն վայրը, որտեղ մատով ցույց ենք տալիս: Վեջերս «Արմավիրի» ՔԿՀ-ի վարչակազմը հրաժարվել էր բացել մի ամբողջ մասնաշենքի դուռը՝ պատճառաբանելով տեսակցությունների արգելքով:
Ընդհանրապես ինչ է նշանակում տեսակցություն: Տեսակցությունը նախատեսվում է իրականացնել հատուկ տեսակցությունների համար նախատեսված սենյակում, խցում տեսակցություն չի նախատեսվում եւ խուց մտնելը չի կարող դիտվել որպես տեսակցություն»:
Փաշինյանը նշեց, որ այս իրավիճակի վերաբերյալ մեկնաբանությունների առումով կառավարությունը խճճվել է. «Կառավարության պարզաբանման մեջ գրված է, որ պատգամավորը կարող է շահագրգռություն ունենալ տվյալ գործի ելքի մեջ: Չհասկացանք, գլխավոր դատախազը, ՄԻ պաշտպանը չի՞ կարող շահագրգռություն ունենալ, քննիչը չի՞ կարող շահագրգռություն ունենալ: Եկեք ՔԿՀ հիմնարկի աշխատողին էլ արգելենք մտնել խուց, որովհետեւ կարող է նա էլ շահագրգռություն ունենալ: Ես սա մեկնաբանում եմ, որ Կառավարությունն հիմա սա մեկնաբանում է որպես «չըխկլը փակ-չըկլը բաց»-ի դրույթ: Այսինքն գնացիր ՔԿՀ, դուռը բացեցին մտար, նշանակում է անարգել մտել ես եւ կարող ես անարգել դուրս գալ, սա ի՞նչ մեկնաբանություն է: Ես ակնկալում եմ, որ ՔԿՀ-ում չլինի դուռ, որ ԱԺ պատգամավորի առաջ չի կարող չբացվել»:
ՀՀ ԱԺ պետաիրավական հարցերի հանձնաժողովի նախագահ Հրայր Թովմասյանն էլ հետաքրքրվեց. «Պարոն Փաշինյան, Դուք տեսակցություն բառը զուտ քրեականական իմաստո՞վ եք ընկալում, թե՞ կարծում եք, որ այլ բովանդակություն ունի։ Ձեզ ծանո՞թ է Ղազարոս Աղայանի բառարանում «տեսակցություն» բառի սահմանումը»:
«Տեսակցություն է նաեւ բանտում գտնվողի հետ հանդիպումը։ Քերականական իմաստով մեր ընկալման տեսակցությունը նաեւ հանդիպումն է, դուք էլ, որ բացեք հոմանիշների բառարանը, կտեսնեք։ Այսինքն, եթե տեսակցությունը հանդիպումն է, իսկ խուց մտնելուց չես կարող ասել ես իրեն չհանդիպեցի, արդյոք այս դեպքում եւս Դուք շարունակում եք պնդել, որ քրեականական իմաստով տեսակցությունն իր մեջ հանդիպումը չի ներառում»,-ասաց Թովմասյանը:
Փաշինյանն էլ արձագանքեց.
«Պարոն Թովմասյան, երեւի դուք ուշադիր չէիք, ես տալիս եմ նույն էդ հարցը, չեք կարող պատասանել, մի կռիվ արեք։ Ասում եմ՝ եթե հսկիչը ամեն օր դուռը բացում, ներս է մտնում էդ խուց եւ հանդիպում է կալանավորին, մինդչեռ նրա հետ տեսակցությունն արգելված է, ի՞նչ է դա։ Ուրեմն ձեր մեկնաբանմամբ, ըստ Աղայանի բառարանի, եթե տեսաացության արգելք է իրականացվում, ուրեմն նրան պիտի նետենք տարտարոսը, որպեսզի որեւէ մեկը նրա հետ չհանդիպի»:
