Google ընկերությունը իր քարտեզագրական ծառայությունում օգտատերերի բողոքների պատճառով հրաժարվել է նոր գործառույթից, որը թույլ էր տալիս քայլելու դեպքում հաշվել ծախսած կալորիաները, հաղորդում է TechCrunch-ը:
Մասնագետները մոտ մեկ շաբաթ առաջ են Google Maps-ում նոր գործառույթը մտցրել:
Նախորդ հանգստյան օրերին օգտատերերը նկատել են, որ եթե այս ծառայության շնորհիվ փորձում են ինչ-որ մի կետից մյուս կետը ճանապարհ դնել, ապա համակարգն իրենց առաջարկում է նաեւ այդ ճանապարհի համար ոտքով քայլելու տարբերակ:
Նշվում էր, թե նշված ճանապարհը ոտքով անցնելու դեպքում մարդն օրական քանի կալորիա կծախսեր: Օգտատերերին նաեւ հաղորդվում էր քանի թխվածքաբլիթ է մոտավորապես պարունակում նման քանակի կալորիաներ, որոնք նրանք կծախսեին, եթե նշված ճանապարհն անցնեին:
Նման գործառույթը բացասական արձագանքի է արժանացել, քանի որ որոշ օգտատերեր վրդովվել են, որ Google-ը իրենց դիետայի խորհուրդներ է տալիս: