2017 թվականի հունվար-օգոստոսին Հայաստանի առեւտրաշրջանառությունն աճել է 12,3 տոկոսով: Այս մասին հոկտեմբերի 18-ին մամուլի ասուլիսի ժամանակ ասաց տնտեսական զարգացման եւ ներդրումների նախարար Սուրեն Կարայանը:
Ըստ որում՝ մեծածախի շրջանառությունն աճել է 20,3 տոկոսով (հիմնականում արդյունաբերական հումքի հաշվին), իսկ մանրածախինը՝ 5,8 տոկոսով:
Կարայանի կարծիքով՝ վերջին ցուցանիշը կապված է երկիր զբոսաշրջիկների հոսքի հետ: Առավել եւս, որ նույն 8 ամիսներին ծառայությունների շրջանառությունն աճել է 12,4 տոկոսով, իսկ դրանց թվում ամենից շատ աճել է հենց հյուրանոցային եւ ռեստորանային բիզնեսը (գրեթե 19 տոկոսով) եւ զվարճանքների ինդուստրիան (15 տոկոսով):
Իսկ ընդհանուր առմամբ, ըստ պաշտոնական ստանդարտների, 2017 թվականի հունվար-հունիսին Հայաստան է այցելել 1 մլն 350 հազար 791 զբոսաշրջիկ, ինչը 24 տոկոսով ավելի շատ է, քան 2016-ի նույն ժամանակահատվածում: Տուրիստական ներքին ուղեւորությունները կազմել են 622 հազար 381՝ 24 տոլոսով աճ է գրանցվել նաեւ այստեղ: