ՀՀ հատուկ քննչական ծառայությունում քրեական գործ է հարուցվել ՀՀ ոստիկանության պետական հատուկ ծառայություն իրականացնող պաշտոնատար անձանց կողմից պաշտոնեական դիրքը չարաշահելու վերաբերյալ փաստաբան Ս. Գեւորգյանի հաղորդման հիման վրա:

ՀՔԾ-ից NEWS.am-ին հայտնում են, որ ՀՀ փաստաբանների պալատի փաստաբան Ս. Գեւորգյանը Հատուկ քննչական ծառայությունում հաղորդում է տվել, որ դատարանի համապատասխան որոշմամբ արգելվել է իր վստահորդ Ս. Մնացականյանի` Երեւան քաղաքում գտնվող տան նկատմամբ որոշակի գործողություններ, այդ թվում` վտարում կատարելը: Սակայն 02.08.2017թ.-ին Ս. Մնացականյանի տուն են այցելել ՀՀ ոստիկանության Էրեբունու բաժնի աշխատակիցները եւ այնտեղ բնակվող նրա ազգականներին տեղեկացրել, որ պատրաստվում են վերջիններիս վտարել նշված հասցեից:

Նրանք ոստիկանության ծառայողներին ներկայացրել են վտարման գործողությունն արգելող` դատարանի համապատասխան որոշումը, սակայն ոստիկանները, անտեսելով այդ հանգամանքը, 14.08.2017թ.-ին Ս. Մնացականյանի ազգականներին վտարել են տնից:

Նկատի ունենալով, որ հիշյալ դեպքի առթիվ նախապատրաստված նյութերում առկա են ՀՀ ոստիկանության աշխատակիցների կողմից պաշտոնեական դիրքը ծառայության շահերին հակառակ օգտագործելու ենթադրյալ հանցագործության հատկանիշներ, ուստի ՀՀ հատուկ քննչական ծառայությունում քրեական գործ է հարուցվել ՀՀ քրեական օրենսգրքի 308-րդ հոդվածի 1-ին մասով:

 Կատարվում է նախաքննություն: