Հայաստանի եւ Ադրբեջանի միջեւ բացակայում է վստահության լուրջ մակարդակը, որը կօգներ նպաստել ղարաբաղյան հակամարտության լուծմանը։ Հոկտեմբերի 18-ին՝ լրագրողների հետ հանդիպման ժամանակ, նման կարծիք է հայտնել The Armenian Interest կենտրոնի ղեկավար Արեգ Գալստյանը։

Նրա խոսքով՝ եթե պետությունների եւ ժողովուրդների միջեւ վստահությունը բացակայում է, որեւէ խնդրի կարգավորման մասին խոսելն անլուրջ է։ «Այդ պատճառով երկու երկրների միջեւ որեւէ շփում չկա։ Մարդիկ չեն շփվում, հայերը չեն ճանաչում ադրբեջանցիների, իսկ ադրբեջանցիները՝ հայերի։ Սահմանը փակ է»,– պարզաբանել է Արեգ Գալստյանը՝ հավելելով, որ Բաքուն ամբողջ ժամանակ մարտական գործողություններ է հրահրում սահմանին եւ դրանով խախտում հրադադարի պահպանման ռեժիմը։

Փորձագետը կարծում է, որ այդ ամենը միայն բացասական հետք է թողնում ընդհանուր առմամբ հայ հասարակության վրա։

«Խոսքը ոչ միայն Լեռնային Ղարաբաղի մասին է։ Սադրանքներ տեղի են ունենում անմիջականորեն հայ–ադրբեջանական սահմանին»,– ասաց Արեգ Գալստյանը եւ հավելեց, որ ո՛չ հայ, ո՛չ ադրբեջանական հասարակությունները պատրաստ չեն ղարաբաղյան հակամարտության լուծմանը, իսկ եթե դրան պատրաստ չէ հասարակությունը, նախագահներից այս դեպքում քիչ բան է կախված։