Հայաստանն աննախադեպ տեմպերով արտահանում է կատարում Իրան: Հոկտեմբերի 18-ին կայացած մամուլի ասուլիսի ժամանակ այս մասին ասաց  տնտեսական զարգացման եւ ներդրումների նախարար Սուրեն Կարայանը:

2017 թվականի առաջին 8 ամիսներին աճը կազմել է 11,2 տոկոս, հավելեց նախարարը:

Մասնավորապես՝ 2016-ի դեկտեմբերին Երեւանում անցկացվել է հայ-իրանական բիզնես համաժողովը, որին մասնակցել է ավելի քան 170 գործարար:

Դրանից բացի, կողմերը համաձայնվել են փոխադարձ ճանաչել միմյանց ապրանքների հավաստագրումը, ինչպես նաեւ մեկը մյուսի համար  բացել հավաստագրման կազմակերպությունների ներկայացուցչություններ: 2017-ի մարտին Երեւանում բացվել է Halal World կազմակերպության ներկայացուցչությունը, որտեղ կարելի է տեղում հալալ մսի հավաստագիր ստանալ եւ առանց ուշացնելու արտահանում կատարել իսլամական երկրներ:

Կարայանը հիշեցրեց, որ Եվրասիական միության երկրներն ավարտում են Իրանի հետ ազատ առեւտրի շուրջ բանակցությունները: Դրա համաձայն՝ հայկական 40 ապրանքների համար մաքսատուրքը կնվազի, ինչպես նաեւ կպարզեցվեն ոչ սակագնային միջոցառումները (օրինակ՝ ներմուծման թույլտվությունը, որը պահանջվում է Իրան կոմերցիոն ներմուծում կատարելու համար):

Մասնավորապես՝ Իրան հանքային ջրի ներմուծման մաքսատուրքը կազմում է 55 տոկոս, բայց կնվազի մինչեւ 10 տոկոս, հավելեց Կարայանը: