Ահաբեկչական խմբավորումները ահաբեկչական խոշոր հարձակումներ են պատրաստում: Այս մասին հայտարարել է ԱՄՆ ներքին անվտանգության նախարարի պաշտոնակատար Էլեյն Դյուկը, հայտնում է The Daily Mail-ը:
«ԻՊ-ը կամ այլ ահաբեկչական խմբավորումներ ցանկանում են խոշոր պայթյուն կազմակերպել, ինչպիսին եղել է սեպտեմբերի 11-ին: Նրանք պատրաստվում են օդանավ օգտագործել, հետախուզությունն այս հարցում ոչ մի կասկած չունի»,- նշել է Դյուկը:
Նրա խոսքով՝ ահաբեկիչները ֆուրգոնների եւ սառը զենքի կարիք ունեն սարսափի մթնոլորտ ստեղծելու եւ իրենց գրոհայիններին անգործ չթողնելու համար, սակայն դա չի նշանակում, որ «նրանք հրաժարվել են օդանավով գլխավոր սցենարից»:
Նախարարի պաշտոնակատարը նշել է, որ ԱՄՆ-ում ահաբեկչական սպառնալիքի մակարդակն «անհավանական բարձր» է: «Ահաբեկիչներն ուժեղ են, նրանք ամեն ինչին արագ են հարմարվում, եւ ահաբեկչության սպառնալիքն այժմ սեպտեմբերի 11-ից ի վեր ամենաբարձր մակարդակում է: Մենք պետք է ունենանք բոլոր հնարավոր միջոցները»,- ՏԱՍՍ-ի փոխանցմամբ՝ ասել է նա: