Հայաստան-ԵՄ Համապարփակ եւ ընդլայնված գործընկերության համաձայնագիրը վերջնականացվել է եւ նախաստորագրվել. Համաձայնագրի ստորագրումը կարող է դառնալ նոյեմբերին Բրյուսելում անցկացվելիք ԵՄ Արեւելյան գործընկերության գագաթաժողովի հիմնական ձեռքբերումներից մեկը: Այս մասին Եվրոպայի հայկական չորրորդ համագումարում ունեցած ելույթի ընթացքում նշել է Արտաքին գործերի նախարար Էդվարդ Նալբանդյանը։
Անդրադառնալով Հայաստան-ԵՄ հարաբերություններին, Էդվարդ Նալբանդյանը, մասնավորապես, նշել է.
«Հայաստան-ԵՄ հարաբերությունները հանդիսանում են Հայաստանի արտաքին քաղաքականության հիմնասյուներից մեկը:
Հայաստանը սերտ կապեր ունի Եվրոպական միության հետ եւ մտադիր է ընդլայնել համապարփակ համագործակցությունը փոխադարձ հետաքրքրություն ներկայացնող բոլոր բնագավառներում:
Եվրոպական միությունն արժեքավոր օժանդակություն է ցուցաբերում մեր երկրում իրականացվող բարեփոխումներին, աջակցում է Հայաստանի կողմից գործադրվող ջանքերին՝ ուղղված մարդու իրավունքների եւ օրենքի գերակայության շարունակական առաջմղմանը, ժողովրդավարական կառույցների ամրապնդմանը, դատական համակարգի եւ արդյունավետ կառավարման բարելավմանը: Կառանձնացնեի նաեւ մեր համագործակցությունն անցած ապրիլին Հայաստանում անցկացված խորհրդարանական ընտրությունների համատեքստում:
Եվրամիության աջակցությունը ներառում է նաեւ Հայաստանի տնտեսության տարբեր ոլորտները՝ այդ թվում էներգետիկան, տրանսպորտը, գյուղատնտեսությունը եւ այլն: Դրանցից մի քանիսը տարածաշրջանային նշանակություն ունեն, ինչպես օրինակ հայ-վրացական սահմանային անցակետերի արդիականացումը եւ բարձրավոլտ էլեկտրահաղորդման գծերի կառուցումը: Մենք ակտիվորեն համագործակցում ենք կրթության, նորարարության, գիտության եւ մշակույթի ոլորտներում, ներառյալ այնպիսի ծրագրերի միջոցով, ինչպիսիք են «Հորիզոն 2020», «Էրազմուս+» եւ այլք: Այս տարի մենք ավարտեցինք «Ստեղծարար Եվրոպա» ծրագրի եւ Ընդհանուր ավիացիոն տարածքի պայմանագրի շուրջ բանակցությունները Եվրոպական միության հետ:
Կցանկանայի հատուկ ընդգծել, որ Հայաստան-ԵՄ Համապարփակ եւ ընդլայնված գործընկերության համաձայնագիրը վերջնականացվել է եւ նախաստորագրվել: Համաձայնագրի ստորագրումը կարող է դառնալ նոյեմբերին Բրյուսելում անցկացվելիք ԵՄ Արեւելյան գործընկերության գագաթաժողովի հիմնական ձեռքբերումներից մեկը:
Հայաստան-ԵՄ համագործակցության օրակարգի հարցերից կցանկանայի առանձնացնել վիզայի ազատականացման երկխոսության մեկնարկի կարեւորությունը, որը ԵՄ Արեւելյան գործընկերության Ռիգայի գագաթաժողովի հռչակագրում ամրագրված հանձնառություններից մեկն էր, եւ կարեւոր նշանակություն ունի շարժունակության ընդլայնման ու մարդկանց միջեւ շփումների խորացման առումով»: