Ոստիկանությունը Մոսկվայում ձերբակալել է հերթական անօրինական տաքսիստին, որին կասկածում են ուղեւորին կողոպտելու մեջ։ Իրավապահ մարմինները հայտնում են, որ կասկածյալը ավելի վաղ կալանավորված հայաստանցի Վահագն Կարապետյանի հայրն է։ Այս մասին հայտնում է «ՌԻԱ Նովոստի»–ն՝ վկայակոչելով իրավապահ մարմիններում իր աղբյուրները։
Ավելի վաղ Մոսկվայի Օստանկինոյի դատարանը կալանավորել էր Վահագն Կարապետյանին, որը զբաղվում էր անօրինական ուղեւորափոխադրումներով։ Նրան մեղադրում են ուղեւորներին կողոպտելու մեջ։ Նա կալանքի տակ կմնա մինչեւ նոյեմբերի 30-ը։ Լրատվամիջոցների փոխանցմամբ՝ նրան մեղավոր են ճանաչել Մոսկվայի 100 բնակչի թունավորելու մեջ։ Նրա ուղեւորներից մեկը մահացել է։
Վահագնի հայրը անծանոթ մարդուն նստեցրել էր իր մեքենան։ Ուղեւորը ցանկացել էր խմել, եւ վարորդը ջուր էր առաջարկել։ Մի քանի կում խմելուց հետո տղամարդն իրեն վատ էր զգացել եւ ուշագնաց եղել։ Հետո նա արթնացել էր տանը՝ հայտնաբերելով, որ գողացել են իր բջջային հեռախոսն ու 35 հազար ռուբլի։
«Օպերատիվ ծառայության աշխատակիցները ձերբակալել են կասկածյալին, որը 53-ամյա արտասահմանցի է։ Նրա բնակարանի խուզարկության ժամանակ ոստիկաններն առգրավել են 20 բջջային հեռախոս, ավելի քան 190 հոգեմետ դեղահաբ, 98 ձեռքի ժամացույց»,– հայտնել են Մոսկվայի ՆԳՆ մամուլի ծառայությունից։
Փաստի առնչությամբ հարուցվել է քրեական գործ։
