Իրադարձությունները, որոնք տեղի են ունենում Թուրքիայում, լրջորեն անհանգստացնում են Եվրոպային, բայց միգրացիոն ճգնաժամին հակազդելու նպատակով հատկացվող օգնության ծավալները առաջիկա տարիներին չեն կրճատվելու։ Այս մասին հայտնել է Գերմանիայի կանցլեր Անգելա Մերկելը՝ Բրյուսելում ԵՄ գագաթնաժողով ժամանելուց հետո, փոխանցում է ՏԱՍՍ-ը։
«Մենք պարտավորություն ենք ստանձնել առաջիկա տարիներին ևս 3 մլրդ եվրո հատկացնել։ Այդ խոստումը մենք պետք է կատարենք, քանի որ այդ գումարը հատկացվելու է փախստականների կարիքներին»,- ասել է նա։
Ընդ որում կանցլերը հիշեցրել է, որ գագաթնաժողովի մասնակիցները քննարկելու են ԵՄ-ին Թուրքիայի անդամակցության մասին բանակցային գործընթացի շրջանակում Անկարային հատկացվող գումարների վճարման սահմանափակման հնարավորությունը։ Հիմա այդ գործընթացը բարդացել է Թուրքիայում մարդու իրավունքների հետ կապված իրավիճակի ֆոնին։ «Այս հարցով լսվելու են բոլոր մասնակիցների դիրքորոշումները։ Ժողովրդավարության մասին մեր պատկերացումներով այնտեղ իրավիճակը սխալ ուղղությամբ է շարժվում»,- հավելել է Մերկելը։