Մոսկվայի կենտրոնում հայազգի տղամարդու սպանության կասկածանքով ձերբակալվել է ՆԳՆ թոշակի անցած փոխգնդապետ, հայտնում է Lenta-ն՝ վկայակոչելով իրավապահ մարմիններում իր աղբյուրները։
Կրակողի անձը հաջողվել է պարզել տեսախցիկների տեսագրությունները դիտելու միջոցով։ Նրան ձերբակալել են նախօրեին Պոդոլսկում։ Պարզվել է, որ կրակողը ՆԳՆ նախկին փոխգնդապետ, Պոդոլսկի շրջանի մասով ՆԳՆ վարչության նախկին աշխատակից է , որը 2016-ին է թոշակի անցել։
«Ձերբակալվածի խոսքով, սպանության համար նա օգտագործել է Մակարով տեսակի ատրճանակ, որը ինչ-որ մեկը թողել էր նրա մեքենայում։ Ընդ որում կրակելուց անմիջապես հետո կասկածյալը դեն է նետել ատրճանակը»,- ասել է աղբյուրը։ Նա նաեւ նշել է, որ հանցագործությունը կատարելու պահին կասկածյալը սթափ է եղել։
Հիշեցնենք, որ սպանության օրը՝ հոկտեմբերի 16-ին, կասկածյալը «Ժիգուլի» մակնիշի մեքենայով է եղել, իսկ նրա զոհը Infiniti մակնիշի մեքենա էր վարում։
Լեսնայա փողոցում նախկին ոստիկանը կտրել է Infiniti-ի ճանապարհը, ճանապարհային կոնֆլիկտը շարունակվել է մինչեւ Նովոսլոբոդկայա փողոց։ Երբ հայազգի վարորդը դուրս է եկել մեքենայից, «Ժիգուլիի» վարորդը մի քանի անգամ կրակել է նրա վրա։
Ռուսաստանի Քննչական կոմիտեի մայրաքաղաքային վարչությունում հայտնել են, որ 40-ամյա կասկածյալն ընդունել է իր մեղավորությունը։ Հիմա լուծվում է ձերբակալվածի հանդեպ խափանման միջոցի ընտրման ու նրան մեղադրանք առաջադրելու հարցը։