Ղարաբաղա-ադրբեջանական շփման գծում հակառակորդի կրակոցից ժամկետային զինծառայող է զոհվել: Հոկտեմբերի 19-ին հյուսիս-արեւելյան ուղղությամբ տեղակայված զորամասերից մեկի պահպանության տեղամասում մահացու հրազենային վիրավորում է ստացել 1998 թվականին ծնված Տիգրան Արմենի Խաչատրյանը: Դեպքի մանրամասները պարզելու համար կատարվում է քննություն:
Կառավարության այսօրվա նիստում վարչապետի հանձնարարականներից մեկը վերաբերել է մայրաքաղաքի ճանապարհների խցանումներին: Աշխատանքային օրերին առաջացող խցանումների հարցն ուսումնասիրելու համար Կարեն Կարապետյանը երկամսյա ժամկետ է սահմանել: Առաջարկել է հաշվի առնել ավտոկայանատեղերի սահմանափակման, ճանապարհային երթեւեկության վերակազմակերպման, այլընտրանքային երթուղիներ կազմելու հնարավորությունը:
Արդարադատության նախարարությունը Դատական օրենսգրքում փոփոխությունների նախագիծ է ներկայացրել. փորձելու են թեթեւացնել վարչական դատարանի ծանրաբեռնվածությունն ու համալրել վերաքննիչի դատավորների կազմը: Կառավարությունը կշարունակի նաեւ աջակցել բարձր առաջադիմություն ունեցող եւ ապրիլյան պատերազմի մարտական հերթապահություն իրականացրած կամ մարտական գործողությունների մասնակցած ուսանողներին: Կրթության նախարարն առաջարկել է Երիտասարդական հիմնադրամին գումար հատկացնել:
«Սասնա ծռերի» 10 անդամի եւ Կարո Եղնուկյանի գործով այսօրվա դատական նիստը սկսվել եւ կարճ ժամանակ անց հետաձգվել է: Ամբաստանյալներից Խաչատուր Գիչյանի ինքնազգացողությունը վատացել է, նրա համար շտապօգնություն են կանչել: Պարզվել է, որ Գիչյանին սրտի ստենտավորում են արել, բայց երկար ժամանակ նա անհրաժեշտ դեղորայք չի ստացել: Ամբաստանյալին հիվանդանոց են տեղափոխել, հնարավոր է՝ նա վիրահատվի: Դատավոր Արտուշ Գաբրիելյանն էլ հետաձգել է նիստը: Հաջորդը տեղի կունենա հոկտեմբերի 26-ին: Նշենք, որ Գաբրիելյանը քննում է «Սասնա ծռեր» խմբի երկու գործերից առանձնացված եւ մեկ գործում միացված մասը: Գործի մյուս երկու մասերը քննելու են Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մեսրոպ Մակյանն ու Էրեբունի եւ Նուբարաշեն վարչական շրջանների ընդհանուր իրավասության դատարանի նախագահ Արթուր Օհանյանը:
Մոսկվայում հայր ու որդի՝ ազգությամբ հայ, անօրինական ուղեւորափոխադրում են իրականացրել եւ ձերբակալվել: Ձերբակալության պատճառը, սակայն, տաքսի ծառայություն մատուցելը չէ: 29-ամյա Վահագն Կարապետյանին կասկածում են շուրջ 100 ուղեւորի թունավորելու մեջ: Նրա զոհերի թվում է եղել նաեւ Ռուսաստանում հայտնի հաղորդավար Արթուր Բիտովը: Իրավապահների տվյալներով՝ տաքսիստն ուղեւորներին թունավորված ջուր է առաջարկել եւ գողացել նրանց արժեքավոր իրերը: Ուղեւորներից մեկը մահացել է: Տաքսիստի բնակարանում ավելի քան 100 ժամացույց է հայտնաբերվել: Վահագն Կարապետյանը 1.5 ամսով կալանավորվել է: Իսկ այսօր ձերբակալվել է նաեւ նրա հայրը: Կարապետյան ավագին նույնպես կասկածում են ուղեւորներին կողոպտելու մեջ։ Նրա բնակարանի խուզարկության ժամանակ ոստիկաններն առգրավել են 20 բջջային հեռախոս, ավելի քան 190 հոգեմետ դեղահաբ, 98 ձեռքի ժամացույց:
Իսպանիան հայտարարել է Կատալոնիայի ինքնավարությունը կասեցնելու որոշման մասին: Երկրի կառավարությունը պատրաստվում է գործարկել Սահմանադրության 155-րդ հոդվածը: Այն թույլ կտա Կատալոնիային զրկել ինքնավարությունից եւ ստանձնել շրջանի կառավարումը: Վարչապետ Մարիանո Ռախոյը հոկտեմբերի 20-ին կառավարության նիստ է հրավիրել: Կատալոնիայի նախագահը հայտարարել է, որ տարածաշրջանն անկախություն կհռչակի, եթե Իսպանիան ինքնավարության կասեցման գործընթաց սկսի: ԵԽ նախագահ Անտոնիո Տայանին էլ հայտարարել է, որ եվրոպական պետությունները չեն սատարի Կատալոնիայի անկախությունը:
Մինչ այդ, արդեն հաշվարկում են կատալոնական ճգնաժամի հետեւանքով վնասները: Կանխատեսումների համաձայն՝ 2018թ. Իսպանիայի տնտեսությունը կարող է մինչեւ 12 միլիարդ եվրոյի վնաս կրել՝ կախված այն բանից, թե որքան կտեւի ճգնաժամը: Նշենք, որ Կատալոնիան ապահովում է Իսպանիայի ՀՆԱ-ի շուրջ 20%-ը, այդ պատճառով ինքնավար շրջանում տեղի ունեցող իրադարձությունները զգալի ազդեցություն են ունենում թագավորության վրա:
Քսենյա Սոբչակը հայտարարել է 2018 թվականին Ռուսաստանի նախագահական ընտրություններում իր թեկնածությունն առաջադրելու մասին եւ իրարանցում առաջացրել մամուլում եւ սոցցանցերում: Ռուսական «Վեդոմոստի»-ին ուղարկած նամակում հաղորդավարուհին նշել է, որ ամբողջ կյանքում ապրել եւ աշխատել է Ռուսաստանում եւ իր համար միեւնույն չէ, թե ինչպիսին կդառնա իր երկիրը: Սոբչակը նաեւ հայտարարել է, որ Ղրիմի պատկանելության հարցը պատրաստվում է լուծել համաշխարհային հանրության եւ հարեւանների հետ հավասար պայմաններով քննարկումների արդյունքում: «Դոժդ» հեռուստաալիքի եթերում Սոբչակը նաեւ պատմել է, որ վերջերս հանդիպել է Վլադիմիր Պուտինի հետ, երբ հոր՝ Անատոլի Սոբչակի մասին ֆիլմի համար նախագահի հետ հարցազրույց է ունեցել: Նա նշել է, որ այդ ժամանակ էլ ընդունել է նախագահի պաշտոնում առաջադրվելու մասին որոշումը, ինչի մասին տեղեկացրել է Պուտինին:
Սոբչակի այս հայտարարությանն ու դրան հետեւած մեկնաբանություններին, թե նախագահի պաշտոնում առաջադրվելու հարցը հաղորդավարուհին քննարկել է Վլադիմիր Պուտինի հետ, ստիպված է եղել արձագանքել Կրեմլի պաշտոնական ներկայացուցիչը: Դմիտրի Պեսկովը նշել է, որ այդ հարցով որեւէ խորհրդակցություն Ռուսաստանի նախագահի հետ չի եղել:
Դոլարը շարունակում է ամրապնդել դիրքերը, 3.5 դրամով թանկացել է նաեւ եվրոն: Հոկտեմբերի 19-ին դոլարի փոխարժեքը կազմել է 481 դրամ, եվրոյինը՝ 568, ռուբլունը՝ 8 դրամ 37 լումա, ֆունտինը՝ 633 դրամ:
Հոկտեմբերի 20-24-ը հանրապետությունում սպասվում է առանց տեղումների եղանակ: Օդի ջերմաստիճանը 2-3 աստիճանով կբարձրանա: Երեւանում նույնպես տեղումներ չեն սպասվում: Մայրաքաղաքում գիշերը կդիտվի +6+8, ցերեկը՝ +19+21 աստիճան տաքություն: