Իտալիայում ստեղծվել է աշխարհի խոշորագույն էլեկտրոնային տվյալների բազան, որտեղ նկարագրված են անհետացած կամ գողացված մշակութային արժեքները։ Բազայում նկարագրված է ավելի քան վեց միլիոն արվեստի գործ։ Այս մասին պատմել է Իտալիայի իրավապահ մարմինների ներկայացուցիչ, գեներալ Պարուլին, ելույթ ունենալով ՄԱԿ-ում, համաշխարհային մշակութային արժեքների պաշտպանության հարցերին նվիրված միջոցառման ժամանակ։
Նրա խոսքով՝ Իտալիայում նաեւ գործարկվել է հատուկ բջջային հավելված, որի շնորհիվ բոլոր ցանկացողները կարող են տեղեկություններ ստանալ անհետացած արտեֆակտերի մասին։ Հավելվածը հասանելի է մի քանի եվրոպական լեզուներով, նաեւ՝ արաբերենով։
Մշակութային արժեքների հարցերով հատուկ ստորաբաժանման գոյության գրեթե 50 տարիների ընթացքում դրա անդամներին հաջողվել է օրինական սեփականատերերին վերադարձնել մոտ 800 հազար նկար ու այլ արվեստի գործեր, կանգնեցնել ավելի քան մեկ միլիոն հնագիտական գտածոների ապօրինի արտահանումն ու բացահայտել հարյուր հազարավոր կեղծիքներ։