2018 թվականի բյուջեով թոշակների ու աշխատավարձերի բարձրացում չի նախատեսվում, քանի որ պետք է խնայել բյուջեի միջոցներն այն մեծացնելու համար: Այս մասին NEWS.am-ի հետ զրույցում ասել է ԱԺ առողջապահության եւ սոցիալական հացերի մշտական հանձնաժողովի ղեկավար, ՀՀԿ-ական Հակոբ Հակոբյանը:
«Թոշակներն ու աշխատավարձերը չենք բարձրացրել, որովհետեւ բյուջեի եղած հնարավարությունները բավարար չեն էդ նպատակի համար, եւ կարծում եմ, որ կա զարգացման հետեւյալ կարգը: Պետք է խնայել միջոցները բյուջեի միջոցները ավելացնելու համար: Երբ որ ունես մեծ նպատակ, պետք է կուտակես միջոցներ, որ հասնեն էդ նպատակին, մեր դեպքում նպատակը պետք է լինի բյուջեն մեծացնելը: Այն հասարակությունը, որ չի ստեղծում, ծախսելու իրավունք չունի»,-ասել է իշխանության ներկայացուցիչը:
Նա անդրադարձել է նաեւ որոշ ոլորտների հատկացումների կրճատումներին: Վստահեցրել է, թե կրճատվել են փոշիացվող գումարները: «Սոցիալական նպատակային ծրագրերից այսօր չենք հրաժարվում, պետությունը չհրաժարվելով սոցիալական ծրագրերից՝ պարտավոր է դա կատարել: Առողջաահության ոլորտում էլ կրճատում է կատարվել: Կրճատվել են այն ծախսերը, որոնք հասարակության համար նպատակային չէր եւ գնում էր գումարների փոշիացում»,- ասել է Հակոբյանը:
