Ժիրայր Սեֆիլյանի եւ մյուսների գործով ամբաստանյալ Ներսես Պողոսյանը նախօրեին տեղափոխվել է պատժախուց, մինչդեռ 22 օր է` հացադուլի մեջ է գտնվում: Այս մասին այսօր` հոկտեմբերի 20-ին, դատական նիստի ժամանակ հայտարարեց ամբաստանյալի պաշտպան Արայիկ Պապիկյանը:
Պաշտպանի խոսքով, ըստ ՔԿՀ-ի հայտարարության, Ներսես Պողոսյանի մոտ արգելված իր է հայտնաբերվել:
«Հետաքրքիր է` ինչպես կարող էր հացադուլի մեջ գտնվող անձի մոտ արգելված իր հայտնաբերվել... Ներսես Պողոսյանի պատժախցի կողքի խուց են տեղափոխել մի անձի, որն ամբողջ ընթացքում հայհոյել է իմ պաշտպանյալին, սպառնալիքներ տվել նրա հարազատների հասցեին: Այդ անձը չէր կարող պատահաբար հայտնվել կողքի խցում, Ներսես Պողոսյանի նկատմամբ հոգեբանական ճնշումներ են գործադրվում, որ դադարեցնի հացադուլը: Ինձ նույնիսկ երեկ թույլ չեն տվել տեսակցել իմ պաշտպանյալի հետ` հայտարարելով, թե դա արվում է անվտանգության առումով»,- ասաց Արայիկ Պապիկյանը:
Փաստաբանը հայտնեց նաեւ, որ Ներսես Պողոսյանն ունի լուրջ առողջական խնդիրներ եւ այսօր ի վիճակի չէ մասնակցել դատական նիստին: Պապիկյանը միջնորդեց նիստը հետաձգել: Մյուս պաշտպանները նույնպես միացան այդ միջնորդությանը: Նշենք, որ Ներսես Պողոսյանը մի կերպ եկավ նիստերի դահլիճ, նա հազիվ էր քայլում: Դատավոր Տաթեւիկ Գրիգորյանը հետաքրքրվեց Ներսես Պողոսյանից` արդյոք ի վիճակի է մասնակցել դատական նիստին:
«Ես ի վիճակի չեմ էստեղ էդքան մնալու»,- ասաց ամբաստանյալը:
Մեղադրող Պետրոս Պետրոսյանը, սակայն, նշեց, որ որեւէ խոչընդոտ չկա նիստը հետաձգելու. «Ամբաստանյալի վարքագիծն էլ է այն մասին խոսում, որ նա կարող է մասնակցել դատական նիստին: Խնդրում եմ միջնորդությունը մերժել»:
Դատավորը մերժեց միջնորդությունն ու որոշում կայացրեց շարունակել դատական նիստը:
«Ես բժշկական օգնությունից հրաժարվել եմ, ես չեմ ուզում նիստին մնալ, ուղարկեք ինձ կալանավայր, կդզվեմ, կգամ»,- հայտարարեց Ներսես Պողոսյանը:
Տաթեւիկ Գրիգորյանն ամեն դեպքում ընդմիջում հայտարարեց եւ Շտապօգնություն հրավիրեց դատարան:
Հիշեցնենք, որ Ներսես Պողոսյանը հացադուլ է հայտարարել եւ պահանջում է փոխել խափանման միջոց կալանավորումը:
