Ժիրայր Սեֆիլյանի եւ մյուսների գործով ամբաստանյալ Ներսես Պողոսյանը, որը 22 օր հացադուլի մեջ է գտնվում, հրաժարվել է, որպեսզի այսօր դատարան հրավիրված շտապօգնության բժիշկները բուժզննման ենթարկեն իրեն: Նախագահող Տաթեւիկ Գրիգորյանը հայտարարեց, որ դատարան հրավիրված շտապբուժօգնության բժշկը հայտնել է, որ առաջրկվել է բուժզննման ենթարկել եւ անհրաժեշտության դեպքում բուժօգնություն ցուցաբերել, սակայն, վերջինը հրաժարվել է` նշելով, որ դրա կարիքը չկա:
Ներսես Պողոսյանը, սակայն, տեղից ավելացրեց` «Բժիշկները սուտ են ասում, բժշկին հարցրել եմ ես` երեք անգամ հացադուլ եմ արել, ինչ կարող է հետս լինել, բժիշկն ասաց` շատ վատ: Հեքիաթ են պատմել բժիշկները»:
Ներսես Պողոսյանի շահերի պաշտպան Նինա Կարապետյանցը նշեց, որ իր պաշտպանյալը ի վիճակի չէ մասնակցել նիստին, նա միջնորդությւոն ներկայացրեց, որպեսզի դատական նիստը հետաձգվի: Սակայն, դատարանը նշեց, որ եթե Ներսես Պողոսյանի ինքնազգացողությունը վատ լիներ, ապա նրան քրեակատարողական հիմնարկից դատարան չէին տեղափոխի:
Ժիրայր Սեֆիլյանը եւ նրա շահերի պաշտպան Տիգրան Հայրապետյանը նշեցին, որ լքում են նիստերի դահլիճը. «Դատարանի համար մարդկային կյանքը, արժեքը ոչինչ չի նշանակում, դուք ստիպում եք, որպեսզի լքենք նիստը»,-ասաց Տիգրան Հայրապետյանը: Իսկ Ժիրայր Սեֆիլյանը ասաց, որ չի պատրաստվում մասնակցել «Ներսես Պողոսյանի խոշտանգմանը»:
Ներսես Պողոսյանն ու նրա շահերի պաշտպանները եւս լքեցին նիստերի դահլիճը:
Նիստերի դահիճում գտնվողները արտահայտեցին իրենց դժգոհությւոնը` վանկարկելով`«Սպանում եք Ներսեսին»:
Տաթեւիկ Գրիգորյանն առանց որեւէ բան ասելու եւս հեռացավ նիստերի դահլիճից:
Ներսես Պողոսյանն անժամկետ հացադուլ է սկսել Երեւանի Շենգավիթ վարչական շրջանի դատարանում տեղի ունեցած նիստից անմիջապես հետո: Նա հացադուլ սկսելու մասին հայտարարել է այն բանից հետո, երբ դատարանը մերժել է նրա խափանման միջոց կալանքը փոխելու վերաբերյալ իր պաշտպանի միջնորդությունը:
Հիշեցնենք, որ Ներսես Պողոսյանը կալանավորվել է 2016 թվականի մայիսի 31-ին: Նրան մեղադրում են ՀՀ Քրեական օրենսգրքի 235 հոդվածի 2-րդ մասով` Ժիրայր Սեֆիլյանի հետ համագործակցության արդյունքում ապօրինի զենք եւ զինամթերք պահելու մեջ: Այս քրեական գործով նախաքննություն ավարտվել է, գործն ուղարկվել է դատարան: