Ղազախստանում անցկացվել է ՀԱՊԿ «Անխախտելի եղբայրություն-2017» զորավարժությունների եզրափակիչ փուլը։

Ղազախստանի ՊՆ մամուլի ծառայությունը հայտնում է, որ զորավարժությունների ընթացքում մշակվել են ՀԱՊԿ Հավաքական խաղաղապահ ուժերի ձեւավորման ու միջազգային խաղաղապահ կազմակերպությունների հետ փոխգործակցության հարցերը։ Նաեւ մշակվել են տեղանքի ականազերծման, ռադիացիոն, քիմիական ու կենսաբանական հետախուզությունների իրականացման, հրդեհների հետեւանքների վերացման, զանգվածային անկարգություններին հակազդելու, հումանիտար բեռներին ուղեկցելու ու ապօրինի զինված խմբավորումները ոչնչացնելու առաջադրանքները։

Այս զորավարժությունների առանձնահատկությունն այն է եղել, որ գործարկվել է ավիացիոն բաղադրիչը, այդ թվում անօդաչու թռչող սարքերը, նաեւ հոգեբանական պայքարի եւ տեղեկատվական հակազդման ստորաբաժանումները։ Զորավարժությունների ընթացքին հետեւել է ՄԱԿ ոստիկանության դեպարտամենտի հասարակական կարգի հարցերով խորհրդական Ջորջիո Ջիայմոն։ Զորավարժություններին մասնակցել է մոտ 1․5 հազար զինծառայող, մոտ 200 միավոր սպառազինություն, ռազմական ու հատուկ տեխնիկա, ավելի քան 25 միավոր թռչող սարք։