Կապանում հուլիսի 21-ին 8-ամյա երեխային վրաերթի ենթարկելու մեջ մեղադրվող Նարեկ Օհանյանը դատապարտվել է մեկուկես տարվա ազատազրկման: NEWS.am-ը Դատական տեղեկատվական համակարգից տեղեկանում է, որ Նարեկ Օհանյանը դատավճռով զրկվել է նաեւ տրանսպորտային միջոցներ վարելու իրավունքից 3 տարի ժամկետով եւ տուգանվել 150.000 ՀՀ դրամի չափով: Սյունիքի մարզի առաջին ատյանի դատարանում Նարեկը լիովին ընդունել է իրեն առաջադրված մեղադրանքը, նրա միջնորդությամբ գործը դատարանում քննվել է արագացված դատաքննության կարգով:
Նշենք, որ անչափահասին վրաերթի ենթարկելու մեջ մեղադրվողը դատավորներից մեկի եղբոր որդին է:
Ըստ մեղադրանքի՝ Նարեկ Օհանյանը, գտնվելով թեթեւ աստիճանի ալկոհոլային հարբածության վիճակում, վարելով «Լեքսուս GX 470» մակնիշի ավտոմեքենա, վրաերթի է ենթարկել ճանապարհի երթեւեկելի մասն իր վարած ավտոմեքենայի ընթացքի ուղղությամբ ձախից դեպի աջ հատող անչափահաս աղջկան, ինչի հետեւանքով աղջիկը ստացել է կյանքի հետ անհամատեղելի մարմնական վնասվածքներ եւ մահացել է:
Բացի այդ, Նարեկ Օհանյանը դեպքի մասին իրավապահ մարմիններին հայտնելու եւ նրանց ներկայանալուն սպասելու փոխարեն դիտավորությամբ թողել է ճանապարհատրանսպորտային պատահարի վայրը եւ իր ավտոմեքենայով դեպքի վայրից փախուստի է դիմել:
Նարեկ Օհանյանին մեղադրանք է առաջադրվել ՀՀ քրեական օրենսգրքի 242-րդ հոդվածի 2-րդ մասով եւ 244-րդ հոդվածով: