Լեռնային Ղարաբաղի եւ նրա շուրջ ստեղծված իրավիճակը մնում է բավականին լարված: Այս մասին հոկտեմբերի 21-ին մամուլի ասուլիսի ժամանակ հայտարարել է Ռուսաստանի Գիտությունների ակադեմիայի Արեւելագիտության ինստիտուտի Կենտրոնական Ասիայի եւ Կովկասի հետազոտությունների կենտրոնի գիտական աշխատող Անդրեյ Արեշեւը:
Արեշեւը անդրադարձել է նաեւ Երեւանի եւ Բաքվի միջեւ բանակցային գործընթացին:
«Մենք գիտենք, որ վերջերս Ժնեւում երկու նախագահների միջեւ հերթական բանակցությունները տեղի ունեցան եւ ինչպես լինում է նման դեպքերում, ցավոք, այդ բանակցությունները մռայլվեցին հայ-ադրբեջանական սահմանի շփման գծի հերթական միջադեպով», - ասել է փորձագետը՝ հավելելով, որ նման դեպքերը չեն նպաստում կողմերի միջեւ վստահության տարրական միջոցների վերականգնմանը:
Նրա խոսքով՝ նման դեպքերը միայն հետաձգում են փոխզիջումային խաղաղ համաձայնագրի մշակումը հակամարտության արագ եւ վերջնական լուծման համար՝ հավելելով, որ իրավիճակը դեռ երկար լարված կմնա:
