Էստոնիայի իշխանությունները ծնողներին են վերադարձրել ընտանիքից խլված 8-ամյա դստերը։
Հիշեցնենք, որ տրամաբանության մեջ չտեղավորվող դեպքը տեղի էր ունեցել Ղազարյանների ընտանիքի հետ: Հուլիսի 11-ին՝ Մոսկվա ուղեւորվելուց երեք օր առաջ, Տալլինում ապրող Անատոլի Ղազարյանի ու Աննա Միխայիլովայի դստերը վերցրել էր Էստոնիայի յուվենալ ծառայությունը:
Փաստաբան Վիոլետա Վոլոկովայի խոսքով, երեխային վերցնելու ֆորմալ պատճառը եղել է այն, որ բնակարանը, որտեղ ապրում էր ընտանիքը, վերանորոգված չէր, եւ որ էստոնական իշխանությունների կարծիքով, աղջկան վնասում էր ծխախոտի ծխի հոտը:
Հոկտեմբերի 21-ին Էստոնիայի խնամակալության մարմինները ծնողներին՝ ռուսաստանաբնակ Անատոլի Ղազարյանին ու Աննա Միխայիլովային են վերադարձրել ութամյա աղջկան, ասվում է ՌԴ նախագահին կից երեխաների իրավունքների լիազոր Աննա Կուզնեցովայի հաղորդագրության մեջ:
Հաղորդվում է, որ Կուզնեցովան, իմանալով կատարվածի մասին, անհապաղ կապվել է Էստոնիայում ՌԴ դեսպանատան հետ:
Պարզվել է, որ երեխան հոկտեմբերին վերցվել է դատարանի որոշման հիման վրա, որից հետո պետք է տեղի ունենար խնամակալ մարմինների նիստը՝ երեխայի հետագա ճակատագրի շուրջ վերջնական որոշում կայացնելու համար: