«Ծառուկյան» դաշինքի պատգամավոր, Աժ եվրաինտեգրման մշտական հանձնաժողովի նախագահ Նաիրա Զոհրաբյանը թեեւ հիմքեր չի տեսնում, որ Հայաստան-ԵՄ համաձայնագրի ստորագրումը կարող է ձախողվել, սակայն կասկածի տակ է առնում այդ համաձայնագրի դրույթների հետագա իրացումը Հայաստանի Հանրապետությունում:
«Համաձայնագրի դրույթների իրագործումը արդեն կախված է մեզանից, թե ինչքանով պատրաստ կլինենք համաձայնագրի դրույթները կյանքի կոչել: Մենք ունենք Սահմանադրություն, բայց ունենք պաշտոնյաների մի խումբ, որոնք Սահմանադրության վրայով օրը հազար անգամ իրենց կեղտոտ ոտքերով գնում-գալիս են: Ունենք Ընտրական օրենսգիրք, որը ստեղծում է հավասար մրցակցային հնարավորություն, բայց մենք տեսնում ենք՝ քանի անգամ են թքում այդ օրենսգրքի վրա: Մենք ունեինք կոռուպցիայի դեմ պայքարի հանձնաժողով, բայց տեսնում ենք, որ կոռուպցիան քայքայում է մեր երկրի ամբողջ համակարգը:
Համաձայնագրի ստորագրումը մի բան է, դրանում ներառված բարեփոխումները թղթից կյանքի կոչելը այլ բան է: Այստեղ պրոբլեմը մեր մեջ պետք է տեսնենք, ու մեր իշխանության քաղաքական կամքից է կախված՝ պատրաստ են, ոչ թե թղթով այլ իրական պայքար մղել կոռուպցիայի եւ ստվերային տնտեսության դեմ»,-ասել է պատգամավորը:
