Վրաստանի ԿԸՀ-ն ավարտել է բոլոր 64 ընտրատարածքների ձայների հաշվարկը, որտեղ քաղաքների եւ շրջանների ղեկավարի ընտրություններ են անցկացվել, ու ներկայացրել է նախնական արդյունքները: Նախնական արդյունքների համաձայն՝ քաղաքապետի ընտրությունների երկրորդ փուլ կարող է անցկացվել Կազբեգիում, Խաշուրիում, Բորժոմիում, Օզուրգեթիում, Մարթվիլիում եւ Քութաիսիում, հայտնում է «Նովոստի Գրուզիան»:
«Երբ վերջնական արդյունքներն ունենանք, կկարողանանք երկրորդ փուլը նշանակել, որը օրենսդրության համաձայն նշանակվում է ընտրություններից հետո 25-րդ օրը: Վերջնական ժամկետը, որը որոշվել է ԿԸՀ միջոցառումների ժամանակացույցում, նոյեմբերի 15-ն է»,- ասել է Վրաստանի ԿԸՀ ներկայացուցիչ Թամար Ժվանիան՝ նշելով, որ երկրորդ փուլը կարող է անցկացվել նաեւ մինչեւ նոյեմբերի 15-ը:
Մնացյալ ընտրատարածքներում, ներառյալ Թբիլիսիում, քաղաքապետի ընտրություններում հաղթել են իշխող «Վրացական երազանք» կուսակցության ներկայացուցիչները:
Մինչեւ վերջին պահը հայտնի չէին Թիանեթիի քաղաքապետի ընտրությունների արդյունքները, որտեղ պայքարում էին 2 թեկնածու՝ «Վրացական երազանքի» թեկնածու Լելա Կիստեսաշվիլին եւ «Միացյալ Վրաստանի համար» կուսակցության թեկնածու Թամազ Մեչիաուրին: Քվեարկության ելքը 5 քվեաթերթիկ են որոշել, որոնք թույլ են տվել Կիստեսաշվիլիին ստանալ ձայների 50,03 տոկոսը
Վեց շրջաններից երեքում, որտեղ ընտրությունների երկրորդ փուլ կանցկացվի՝ Մարթվիլիում, Քութաիսիում եւ Կազբեգիում, քաղաքապետի պաշտոնի համար կպայքարեն «Վարցական երազանքի» եւ ընդդիմադի «Միացյալ ազգային շարժման» թեկնածուները: Օզուրգեթիի եւ Խաշուրիի ընտրողները երկրորդ փուլում ընտրություն կկատարեն իշխող կուսակցության եւ անկախ թեկնածուների միջեւ:
