ՀՀ ԱԺ պաշտպանության եւ անվտանգության մշտական հանձնաժողովում քննարկվող «Ոստիկանության մասին» ՀՀ օրենքում կատարվող փոփոխություններով առաջարկվում է ոստիկանությանը թույլատրել հաշվառել եւ վարել ԴՆԹ քարտադարաններ:
Այս մասին, այսօր՝ հոկտեմբերի 23-ին, ՀՀ ԱԺ պաշտպանության եւ անվտանգության հարցերի հանձնաժողովի նիստում հայտարարել է ՀՀ փոխոստիկանապետ, նախագծի հիմնական զեկուցող Վարդան Եղիազարյանը՝ ներկայացնելով «Ոստիկանության մասին» ՀՀ օրենքում կատարվող փոփոխությունների վերաբերյալ օրինագիծը:
«Մատնադրոշմային հաշվառման համակարգը, որը նույնականացման հիմնական միջոցն է, այլեւս բավարար չէ ծանր եւ առանձնապես ծանր հանգացործություն արած մարդկանց բացահայտման համար, քանի որ, նույնիսկ հասարակ ձեռնոց օգտագործելով, հասարակ անձինք կարող են մատնահետքեր չթողնել, իսկ դիակներից ոչ միշտ է հնարավոր լինում մատնահետք վերցնել», - ասաց Վարդան Եղիազարյանը։
ՀՀ ԱԺ պաշտպանության եւ անվտանգության հանձնաժողովի նախագահ Կորյուն Նահապետյանի հարցին, թե ո՞րն է լինելու այն նպատակը, որին հասնելու միակ ճանապարհը ԴՆԹ բնութագրերի հաշվառման իրականացումն է, քանի որ պետք է այնպես անել, որ անձնական տվյալների պաշտպանության հետ հակասություն չլինի: Ի պատասխան փոխոստիկանապետն ասաց, որ առաջարկվող փոփոխություններում որոշակի ճշգրտումներ եւ լրամշակումներ կլինեն, ինչը թույլ կտա խուսափել անձնական տվյալների պաշտպանությունը խախտելուց։
Հանձնաժողովը հավանության արժանացրեց օրենքի նախագիծը: Այն ընդգրկվեց հոկտեմբերի 24-ն մեկնարկող ԱԺ լիագումար նիստի օրակարգ: